ఇన్ద్ర పిబ తుభ్యం సుతో మదాయావ స్య హరీ వి ముచా సఖాయా |
ఉత ప్ర గాయ గణ ఆ నిషద్యాథా యజ్ఞాయ గృణతే వయో ధాః || 6-040-01
అస్య పిబ యస్య జజ్ఞాన ఇన్ద్ర మదాయ క్రత్వే అపిబో విరప్శిన్ |
తమ్ ఉ తే గావో నర ఆపో అద్రిర్ ఇన్దుం సమ్ అహ్యన్ పీతయే సమ్ అస్మై || 6-040-02
సమిద్ధే అగ్నౌ సుత ఇన్ద్ర సోమ ఆ త్వా వహన్తు హరయో వహిష్ఠాః |
త్వాయతా మనసా జోహవీమీన్ద్రా యాహి సువితాయ మహే నః || 6-040-03
ఆ యాహి శశ్వద్ ఉశతా యయాథేన్ద్ర మహా మనసా సోమపేయమ్ |
ఉప బ్రహ్మాణి శృణవ ఇమా నో ऽథా తే యజ్ఞస్ తన్వే వయో ధాత్ || 6-040-04
యద్ ఇన్ద్ర దివి పార్యే యద్ ఋధగ్ యద్ వా స్వే సదనే యత్ర వాసి |
అతో నో యజ్ఞమ్ అవసే నియుత్వాన్ సజోషాః పాహి గిర్వణో మరుద్భిః || 6-040-05
