మన్ద్రస్య కవేర్ దివ్యస్య వహ్నేర్ విప్రమన్మనో వచనస్య మధ్వః |
అపా నస్ తస్య సచనస్య దేవేషో యువస్వ గృణతే గోగ్రాః || 6-039-01
అయమ్ ఉశానః పర్య్ అద్రిమ్ ఉస్రా ఋతధీతిభిర్ ఋతయుగ్ యుజానః |
రుజద్ అరుగ్ణం వి వలస్య సానుమ్ పణీవచోభిర్ అభి యోధద్ ఇన్ద్రః || 6-039-02
అయం ద్యోతయద్ అద్యుతో వ్య్ అక్తూన్ దోషా వస్తోః శరద ఇన్దుర్ ఇన్ద్ర |
ఇమం కేతుమ్ అదధుర్ నూ చిద్ అహ్నాం శుచిజన్మన ఉషసశ్ చకార || 6-039-03
అయం రోచయద్ అరుచో రుచానో ऽయం వాసయద్ వ్య్ ఋతేన పూర్వీః |
అయమ్ ఈయత ఋతయుగ్భిర్ అశ్వైః స్వర్విదా నాభినా చర్షణిప్రాః || 6-039-04
నూ గృణానో గృణతే ప్రత్న రాజన్న్ ఇషః పిన్వ వసుదేయాయ పూర్వీః |
అప ఓషధీర్ అవిషా వనాని గా అర్వతో నౄన్ ఋచసే రిరీహి || 6-039-05
