అర్వాగ్ రథం విశ్వవారం త ఉగ్రేన్ద్ర యుక్తాసో హరయో వహన్తు |
కీరిశ్ చిద్ ధి త్వా హవతే స్వర్వాన్ ఋధీమహి సధమాదస్ తే అద్య || 6-037-01
ప్రో ద్రోణే హరయః కర్మాగ్మన్ పునానాస ఋజ్యన్తో అభూవన్ |
ఇన్ద్రో నో అస్య పూర్వ్యః పపీయాద్ ద్యుక్షో మదస్య సోమ్యస్య రాజా || 6-037-02
ఆసస్రాణాసః శవసానమ్ అచ్ఛేన్ద్రం సుచక్రే రథ్యాసో అశ్వాః |
అభి శ్రవ ఋజ్యన్తో వహేయుర్ నూ చిన్ ను వాయోర్ అమృతం వి దస్యేత్ || 6-037-03
వరిష్ఠో అస్య దక్షిణామ్ ఇయర్తీన్ద్రో మఘోనాం తువికూర్మితమః |
యయా వజ్రివః పరియాస్య్ అంహో మఘా చ ధృష్ణో దయసే వి సూరీన్ || 6-037-04
ఇన్ద్రో వాజస్య స్థవిరస్య దాతేన్ద్రో గీర్భిర్ వర్ధతాం వృద్ధమహాః |
ఇన్ద్రో వృత్రం హనిష్ఠో అస్తు సత్వా తా సూరిః పృణతి తూతుజానః || 6-037-05
