సం చ త్వే జగ్ముర్ గిర ఇన్ద్ర పూర్వీర్ వి చ త్వద్ యన్తి విభ్వో మనీషాః |
పురా నూనం చ స్తుతయ ఋషీణామ్ పస్పృధ్ర ఇన్ద్రే అధ్య్ ఉక్థార్కా || 6-034-01
పురుహూతో యః పురుగూర్త ఋభ్వాఏకః పురుప్రశస్తో అస్తి యజ్ఞైః |
రథో న మహే శవసే యుజానో ऽస్మాభిర్ ఇన్ద్రో అనుమాద్యో భూత్ || 6-034-02
న యం హింసన్తి ధీతయో న వాణీర్ ఇన్ద్రం నక్షన్తీద్ అభి వర్ధయన్తీః |
యది స్తోతారః శతం యత్ సహస్రం గృణన్తి గిర్వణసం శం తద్ అస్మై || 6-034-03
అస్మా ఏతద్ దివ్య్ అర్చేవ మాసా మిమిక్ష ఇన్ద్రే న్య్ అయామి సోమః |
జనం న ధన్వన్న్ అభి సం యద్ ఆపః సత్రా వావృధుర్ హవనాని యజ్ఞైః || 6-034-04
అస్మా ఏతన్ మహ్య్ ఆఙ్గూషమ్ అస్మా ఇన్ద్రాయ స్తోత్రమ్ మతిభిర్ అవాచి |
అసద్ యథా మహతి వృత్రతూర్య ఇన్ద్రో విశ్వాయుర్ అవితా వృధశ్ చ || 6-034-05
