అగ్నే స క్షేషద్ ఋతపా ఋతేజా ఉరు జ్యోతిర్ నశతే దేవయుష్ టే |
యం త్వమ్ మిత్రేణ వరుణః సజోషా దేవ పాసి త్యజసా మర్తమ్ అంహః || 6-003-01
ఈజే యజ్ఞేభిః శశమే శమీభిర్ ఋధద్వారాయాగ్నయే దదాశ |
ఏవా చన తం యశసామ్ అజుష్టిర్ నాంహో మర్తం నశతే న ప్రదృప్తిః || 6-003-02
సూరో న యస్య దృశతిర్ అరేపా భీమా యద్ ఏతి శుచతస్ త ఆ ధీః |
హేషస్వతః శురుధో నాయమ్ అక్తోః కుత్రా చిద్ రణ్వో వసతిర్ వనేజాః || 6-003-03
తిగ్మం చిద్ ఏమ మహి వర్పో అస్య భసద్ అశ్వో న యమసాన ఆసా |
విజేహమానః పరశుర్ న జిహ్వాం ద్రవిర్ న ద్రావయతి దారు ధక్షత్ || 6-003-04
స ఇద్ అస్తేవ ప్రతి ధాద్ అసిష్యఞ్ ఛిశీత తేజో ऽయసో న ధారామ్ |
చిత్రధ్రజతిర్ అరతిర్ యో అక్తోర్ వేర్ న ద్రుషద్వా రఘుపత్మజంహాః || 6-003-05
స ఈం రేభో న ప్రతి వస్త ఉస్రాః శోచిషా రారపీతి మిత్రమహాః |
నక్తం య ఈమ్ అరుషో యో దివా నౄన్ అమర్త్యో అరుషో యో దివా నౄన్ || 6-003-06
దివో న యస్య విధతో నవీనోద్ వృషా రుక్ష ఓషధీషు నూనోత్ |
ఘృణా న యో ధ్రజసా పత్మనా యన్న్ ఆ రోదసీ వసునా దం సుపత్నీ || 6-003-07
ధాయోభిర్ వా యో యుజ్యేభిర్ అర్కైర్ విద్యున్ న దవిద్యోత్ స్వేభిః శుష్మైః |
శర్ధో వా యో మరుతాం తతక్ష ఋభుర్ న త్వేషో రభసానో అద్యౌత్ || 6-003-08
