యా త ఊతిర్ అవమా యా పరమా యా మధ్యమేన్ద్ర శుష్మిన్న్ అస్తి |
తాభిర్ ఊ షు వృత్రహత్యే ऽవీర్ న ఏభిశ్ చ వాజైర్ మహాన్ న ఉగ్ర || 6-025-01
ఆభి స్పృధో మిథతీర్ అరిషణ్యన్న్ అమిత్రస్య వ్యథయా మన్యుమ్ ఇన్ద్ర |
ఆభిర్ విశ్వా అభియుజో విషూచీర్ ఆర్యాయ విశో ऽవ తారీర్ దాసీః || 6-025-02
ఇన్ద్ర జామయ ఉత యే ऽజామయో ऽర్వాచీనాసో వనుషో యుయుజ్రే |
త్వమ్ ఏషాం విథురా శవాంసి జహి వృష్ణ్యాని కృణుహీ పరాచః || 6-025-03
శూరో వా శూరం వనతే శరీరైస్ తనూరుచా తరుషి యత్ కృణ్వైతే |
తోకే వా గోషు తనయే యద్ అప్సు వి క్రన్దసీ ఉర్వరాసు బ్రవైతే || 6-025-04
నహి త్వా శూరో న తురో న ధృష్ణుర్ న త్వా యోధో మన్యమానో యుయోధ |
ఇన్ద్ర నకిష్ ట్వా ప్రత్య్ అస్త్య్ ఏషాం విశ్వా జాతాన్య్ అభ్య్ అసి తాని || 6-025-05
స పత్యత ఉభయోర్ నృమ్ణమ్ అయోర్ యదీ వేధసః సమిథే హవన్తే |
వృత్రే వా మహో నృవతి క్షయే వా వ్యచస్వన్తా యది వితన్తసైతే || 6-025-06
అధ స్మా తే చర్షణయో యద్ ఏజాన్ ఇన్ద్ర త్రాతోత భవా వరూతా |
అస్మాకాసో యే నృతమాసో అర్య ఇన్ద్ర సూరయో దధిరే పురో నః || 6-025-07
అను తే దాయి మహ ఇన్ద్రియాయ సత్రా తే విశ్వమ్ అను వృత్రహత్యే |
అను క్షత్రమ్ అను సహో యజత్రేన్ద్ర దేవేభిర్ అను తే నృషహ్యే || 6-025-08
ఏవా న స్పృధః సమ్ అజా సమత్స్వ్ ఇన్ద్ర రారన్ధి మిథతీర్ అదేవీః |
విద్యామ వస్తోర్ అవసా గృణన్తో భరద్వాజా ఉత త ఇన్ద్ర నూనమ్ || 6-025-09
