వృషా మద ఇన్ద్రే శ్లోక ఉక్థా సచా సోమేషు సుతపా ఋజీషీ |
అర్చత్ర్యో మఘవా నృభ్య ఉక్థైర్ ద్యుక్షో రాజా గిరామ్ అక్షితోతిః || 6-024-01
తతురిర్ వీరో నర్యో విచేతాః శ్రోతా హవం గృణత ఉర్వ్యూతిః |
వసుః శంసో నరాం కారుధాయా వాజీ స్తుతో విదథే దాతి వాజమ్ || 6-024-02
అక్షో న చక్ర్యోః శూర బృహన్ ప్ర తే మహ్నా రిరిచే రోదస్యోః |
వృక్షస్య ను తే పురుహూత వయా వ్య్ ఊతయో రురుహుర్ ఇన్ద్ర పూర్వీః || 6-024-03
శచీవతస్ తే పురుశాక శాకా గవామ్ ఇవ స్రుతయః సంచరణీః |
వత్సానాం న తన్తయస్ త ఇన్ద్ర దామన్వన్తో అదామానః సుదామన్ || 6-024-04
అన్యద్ అద్య కర్వరమ్ అన్యద్ ఉ శ్వో ऽసచ్ చ సన్ ముహుర్ ఆచక్రిర్ ఇన్ద్రః |
మిత్రో నో అత్ర వరుణశ్ చ పూషార్యో వశస్య పర్యేతాస్తి || 6-024-05
వి త్వద్ ఆపో న పర్వతస్య పృష్ఠాద్ ఉక్థేభిర్ ఇన్ద్రానయన్త యజ్ఞైః |
తం త్వాభిః సుష్టుతిభిర్ వాజయన్త ఆజిం న జగ్ముర్ గిర్వాహో అశ్వాః || 6-024-06
న యం జరన్తి శరదో న మాసా న ద్యావ ఇన్ద్రమ్ అవకర్శయన్తి |
వృద్ధస్య చిద్ వర్ధతామ్ అస్య తనూ స్తోమేభిర్ ఉక్థైశ్ చ శస్యమానా || 6-024-07
న వీళవే నమతే న స్థిరాయ న శర్ధతే దస్యుజూతాయ స్తవాన్ |
అజ్రా ఇన్ద్రస్య గిరయశ్ చిద్ ఋష్వా గమ్భీరే చిద్ భవతి గాధమ్ అస్మై || 6-024-08
గమ్భీరేణ న ఉరుణామత్రిన్ ప్రేషో యన్ధి సుతపావన్ వాజాన్ |
స్థా ఊ షు ఊర్ధ్వ ఊతీ అరిషణ్యన్న్ అక్తోర్ వ్యుష్టౌ పరితక్మ్యాయామ్ || 6-024-09
సచస్వ నాయమ్ అవసే అభీక ఇతో వా తమ్ ఇన్ద్ర పాహి రిషః |
అమా చైనమ్ అరణ్యే పాహి రిషో మదేమ శతహిమాః సువీరాః || 6-024-10
