సుత ఇత్ త్వం నిమిశ్ల ఇన్ద్ర సోమే స్తోమే బ్రహ్మణి శస్యమాన ఉక్థే |
యద్ వా యుక్తాభ్యామ్ మఘవన్ హరిభ్యామ్ బిభ్రద్ వజ్రమ్ బాహ్వోర్ ఇన్ద్ర యాసి || 6-023-01
యద్ వా దివి పార్యే సుష్విమ్ ఇన్ద్ర వృత్రహత్యే ऽవసి శూరసాతౌ |
యద్ వా దక్షస్య బిభ్యుషో అబిభ్యద్ అరన్ధయః శర్ధత ఇన్ద్ర దస్యూన్ || 6-023-02
పాతా సుతమ్ ఇన్ద్రో అస్తు సోమమ్ ప్రణేనీర్ ఉగ్రో జరితారమ్ ఊతీ |
కర్తా వీరాయ సుష్వయ ఉలోకం దాతా వసు స్తువతే కీరయే చిత్ || 6-023-03
గన్తేయాన్తి సవనా హరిభ్యామ్ బభ్రిర్ వజ్రమ్ పపిః సోమం దదిర్ గాః |
కర్తా వీరం నర్యం సర్వవీరం శ్రోతా హవం గృణత స్తోమవాహాః || 6-023-04
అస్మై వయం యద్ వావాన తద్ వివిష్మ ఇన్ద్రాయ యో నః ప్రదివో అపస్ కః |
సుతే సోమే స్తుమసి శంసద్ ఉక్థేన్ద్రాయ బ్రహ్మ వర్ధనం యథాసత్ || 6-023-05
బ్రహ్మాణి హి చకృషే వర్ధనాని తావత్ త ఇన్ద్ర మతిభిర్ వివిష్మః |
సుతే సోమే సుతపాః శంతమాని రాణ్డ్యా క్రియాస్మ వక్షణాని యజ్ఞైః || 6-023-06
స నో బోధి పురోళాశం రరాణః పిబా తు సోమం గోఋజీకమ్ ఇన్ద్ర |
ఏదమ్ బర్హిర్ యజమానస్య సీదోరుం కృధి త్వాయత ఉలోకమ్ || 6-023-07
స మన్దస్వా హ్య్ అను జోషమ్ ఉగ్ర ప్ర త్వా యజ్ఞాస ఇమే అశ్నువన్తు |
ప్రేమే హవాసః పురుహూతమ్ అస్మే ఆ త్వేయం ధీర్ అవస ఇన్ద్ర యమ్యాః || 6-023-08
తం వః సఖాయః సం యథా సుతేషు సోమేభిర్ ఈమ్ పృణతా భోజమ్ ఇన్ద్రమ్ |
కువిత్ తస్మా అసతి నో భరాయ న సుష్విమ్ ఇన్ద్రో ऽవసే మృధాతి || 6-023-09
ఏవేద్ ఇన్ద్రః సుతే అస్తావి సోమే భరద్వాజేషు క్షయద్ ఇన్ మఘోనః |
అసద్ యథా జరిత్ర ఉత సూరిర్ ఇన్ద్రో రాయో విశ్వవారస్య దాతా || 6-023-10
