పురో వో మన్ద్రం దివ్యం సువృక్తిమ్ ప్రయతి యజ్ఞే అగ్నిమ్ అధ్వరే దధిధ్వమ్ |
పుర ఉక్థేభిః స హి నో విభావా స్వధ్వరా కరతి జాతవేదాః || 6-010-01
తమ్ ఉ ద్యుమః పుర్వణీక హోతర్ అగ్నే అగ్నిభిర్ మనుష ఇధానః |
స్తోమం యమ్ అస్మై మమతేవ శూషం ఘృతం న శుచి మతయః పవన్తే || 6-010-02
పీపాయ స శ్రవసా మర్త్యేషు యో అగ్నయే దదాశ విప్ర ఉక్థైః |
చిత్రాభిస్ తమ్ ఊతిభిశ్ చిత్రశోచిర్ వ్రజస్య సాతా గోమతో దధాతి || 6-010-03
ఆ యః పప్రౌ జాయమాన ఉర్వీ దూరేదృశా భాసా కృష్ణాధ్వా |
అధ బహు చిత్ తమ ఊర్మ్యాయాస్ తిరః శోచిషా దదృశే పావకః || 6-010-04
నూ నశ్ చిత్రమ్ పురువాజాభిర్ ఊతీ అగ్నే రయిమ్ మఘవద్భ్యశ్ చ ధేహి |
యే రాధసా శ్రవసా చాత్య్ అన్యాన్ సువీర్యేభిశ్ చాభి సన్తి జనాన్ || 6-010-05
ఇమం యజ్ఞం చనో ధా అగ్న ఉశన్ యం త ఆసానో జుహుతే హవిష్మాన్ |
భరద్వాజేషు దధిషే సువృక్తిమ్ అవీర్ వాజస్య గధ్యస్య సాతౌ || 6-010-06
వి ద్వేషాంసీనుహి వర్ధయేళామ్ మదేమ శతహిమాః సువీరాః || 6-010-07
