త్వం హ్య్ అగ్నే ప్రథమో మనోతాస్యా ధియో అభవో దస్మ హోతా |
త్వం సీం వృషన్న్ అకృణోర్ దుష్టరీతు సహో విశ్వస్మై సహసే సహధ్యై || 6-001-01
అధా హోతా న్య్ అసీదో యజీయాన్ ఇళస్ పద ఇషయన్న్ ఈడ్యః సన్ |
తం త్వా నరః ప్రథమం దేవయన్తో మహో రాయే చితయన్తో అను గ్మన్ || 6-001-02
వృతేవ యన్తమ్ బహుభిర్ వసవ్యాస్ త్వే రయిం జాగృవాంసో అను గ్మన్ |
రుశన్తమ్ అగ్నిం దర్శతమ్ బృహన్తం వపావన్తం విశ్వహా దీదివాంసమ్ || 6-001-03
పదం దేవస్య నమసా వ్యన్తః శ్రవస్యవః శ్రవ ఆపన్న్ అమృక్తమ్ |
నామాని చిద్ దధిరే యజ్ఞియాని భద్రాయాం తే రణయన్త సందృష్టౌ || 6-001-04
త్వాం వర్ధన్తి క్షితయః పృథివ్యాం త్వాం రాయ ఉభయాసో జనానామ్ |
త్వం త్రాతా తరణే చేత్యో భూః పితా మాతా సదమ్ ఇన్ మానుషాణామ్ || 6-001-05
సపర్యేణ్యః స ప్రియో విక్ష్వ్ అగ్నిర్ హోతా మన్ద్రో ని షసాదా యజీయాన్ |
తం త్వా వయం దమ ఆ దీదివాంసమ్ ఉప జ్ఞుబాధో నమసా సదేమ || 6-001-06
తం త్వా వయం సుధ్యో నవ్యమ్ అగ్నే సుమ్నాయవ ఈమహే దేవయన్తః |
త్వం విశో అనయో దీద్యానో దివో అగ్నే బృహతా రోచనేన || 6-001-07
విశాం కవిం విశ్పతిం శశ్వతీనాం నితోశనం వృషభం చర్షణీనామ్ |
ప్రేతీషణిమ్ ఇషయన్తమ్ పావకం రాజన్తమ్ అగ్నిం యజతం రయీణామ్ || 6-001-08
సో అగ్న ఈజే శశమే చ మర్తో యస్ త ఆనట్ సమిధా హవ్యదాతిమ్ |
య ఆహుతిమ్ పరి వేదా నమోభిర్ విశ్వేత్ స వామా దధతే త్వోతః || 6-001-09
అస్మా ఉ తే మహి మహే విధేమ నమోభిర్ అగ్నే సమిధోత హవ్యైః |
వేదీ సూనో సహసో గీర్భిర్ ఉక్థైర్ ఆ తే భద్రాయాం సుమతౌ యతేమ || 6-001-10
ఆ యస్ తతన్థ రోదసీ వి భాసా శ్రవోభిశ్ చ శ్రవస్యస్ తరుత్రః |
బృహద్భిర్ వాజై స్థవిరేభిర్ అస్మే రేవద్భిర్ అగ్నే వితరం వి భాహి || 6-001-11
నృవద్ వసో సదమ్ ఇద్ ధేహ్య్ అస్మే భూరి తోకాయ తనయాయ పశ్వః |
పూర్వీర్ ఇషో బృహతీర్ ఆరే-అఘా అస్మే భద్రా సౌశ్రవసాని సన్తు || 6-001-12
పురూణ్య్ అగ్నే పురుధా త్వాయా వసూని రాజన్ వసుతా తే అశ్యామ్ |
పురూణి హి త్వే పురువార సన్త్య్ అగ్నే వసు విధతే రాజని త్వే || 6-001-13
