ఇన్ద్రాగ్నీ యమ్ అవథ ఉభా వాజేషు మర్త్యమ్ |
దృళ్హా చిత్ స ప్ర భేదతి ద్యుమ్నా వాణీర్ ఇవ త్రితః || 5-086-01
యా పృతనాసు దుష్టరా యా వాజేషు శ్రవాయ్యా |
యా పఞ్చ చర్షణీర్ అభీన్ద్రాగ్నీ తా హవామహే || 5-086-02
తయోర్ ఇద్ అమవచ్ ఛవస్ తిగ్మా దిద్యున్ మఘోనోః |
ప్రతి ద్రుణా గభస్త్యోర్ గవాం వృత్రఘ్న ఏషతే || 5-086-03
తా వామ్ ఏషే రథానామ్ ఇన్ద్రాగ్నీ హవామహే |
పతీ తురస్య రాధసో విద్వాంసా గిర్వణస్తమా || 5-086-04
తా వృధన్తావ్ అను ద్యూన్ మర్తాయ దేవావ్ అదభా |
అర్హన్తా చిత్ పురో దధే ऽంశేవ దేవావ్ అర్వతే || 5-086-05
ఏవేన్ద్రాగ్నిభ్యామ్ అహావి హవ్యం శూష్యం ఘృతం న పూతమ్ అద్రిభిః |
తా సూరిషు శ్రవో బృహద్ రయిం గృణత్సు దిధృతమ్ ఇషం గృణత్సు దిధృతమ్ || 5-086-06
