యద్ అద్య స్థః పరావతి యద్ అర్వావత్య్ అశ్వినా |
యద్ వా పురూ పురుభుజా యద్ అన్తరిక్ష ఆ గతమ్ || 5-073-01
ఇహ త్యా పురుభూతమా పురూ దంసాంసి బిభ్రతా |
వరస్యా యామ్య్ అధ్రిగూ హువే తువిష్టమా భుజే || 5-073-02
ఈర్మాన్యద్ వపుషే వపుశ్ చక్రం రథస్య యేమథుః |
పర్య్ అన్యా నాహుషా యుగా మహ్నా రజాంసి దీయథః || 5-073-03
తద్ ఊ షు వామ్ ఏనా కృతం విశ్వా యద్ వామ్ అను ష్టవే |
నానా జాతావ్ అరేపసా సమ్ అస్మే బన్ధుమ్ ఏయథుః || 5-073-04
ఆ యద్ వాం సూర్యా రథం తిష్ఠద్ రఘుష్యదం సదా |
పరి వామ్ అరుషా వయో ఘృణా వరన్త ఆతపః || 5-073-05
యువోర్ అత్రిశ్ చికేతతి నరా సుమ్నేన చేతసా |
ఘర్మం యద్ వామ్ అరేపసం నాసత్యాస్నా భురణ్యతి || 5-073-06
ఉగ్రో వాం కకుహో యయిః శృణ్వే యామేషు సంతనిః |
యద్ వాం దంసోభిర్ అశ్వినాత్రిర్ నరావవర్తతి || 5-073-07
మధ్వ ఊ షు మధూయువా రుద్రా సిషక్తి పిప్యుషీ |
యత్ సముద్రాతి పర్షథః పక్వాః పృక్షో భరన్త వామ్ || 5-073-08
సత్యమ్ ఇద్ వా ఉ అశ్వినా యువామ్ ఆహుర్ మయోభువా |
తా యామన్ యామహూతమా యామన్న్ ఆ మృళయత్తమా || 5-073-09
ఇమా బ్రహ్మాణి వర్ధనాశ్విభ్యాం సన్తు శంతమా |
యా తక్షామ రథాఇవావోచామ బృహన్ నమః || 5-073-10
