ఆ రుద్రాస ఇన్ద్రవన్తః సజోషసో హిరణ్యరథాః సువితాయ గన్తన |
ఇయం వో అస్మత్ ప్రతి హర్యతే మతిస్ తృష్ణజే న దివ ఉత్సా ఉదన్యవే || 5-057-01
వాశీమన్త ఋష్టిమన్తో మనీషిణః సుధన్వాన ఇషుమన్తో నిషఙ్గిణః |
స్వశ్వా స్థ సురథాః పృశ్నిమాతరః స్వాయుధా మరుతో యాథనా శుభమ్ || 5-057-02
ధూనుథ ద్యామ్ పర్వతాన్ దాశుషే వసు ని వో వనా జిహతే యామనో భియా |
కోపయథ పృథివీమ్ పృశ్నిమాతరః శుభే యద్ ఉగ్రాః పృషతీర్ అయుగ్ధ్వమ్ || 5-057-03
వాతత్విషో మరుతో వర్షనిర్ణిజో యమా ఇవ సుసదృశః సుపేశసః |
పిశఙ్గాశ్వా అరుణాశ్వా అరేపసః ప్రత్వక్షసో మహినా ద్యౌర్ ఇవోరవః || 5-057-04
పురుద్రప్సా అఞ్జిమన్తః సుదానవస్ త్వేషసందృశో అనవభ్రరాధసః |
సుజాతాసో జనుషా రుక్మవక్షసో దివో అర్కా అమృతం నామ భేజిరే || 5-057-05
ఋష్టయో వో మరుతో అంసయోర్ అధి సహ ఓజో బాహ్వోర్ వో బలం హితమ్ |
నృమ్ణా శీర్షస్వ్ ఆయుధా రథేషు వో విశ్వా వః శ్రీర్ అధి తనూషు పిపిశే || 5-057-06
గోమద్ అశ్వావద్ రథవత్ సువీరం చన్ద్రవద్ రాధో మరుతో దదా నః |
ప్రశస్తిం నః కృణుత రుద్రియాసో భక్షీయ వో ऽవసో దైవ్యస్య || 5-057-07
హయే నరో మరుతో మృళతా నస్ తువీమఘాసో అమృతా ఋతజ్ఞాః |
సత్యశ్రుతః కవయో యువానో బృహద్గిరయో బృహద్ ఉక్షమాణాః || 5-057-08
