ప్ర శర్ధాయ మారుతాయ స్వభానవ ఇమాం వాచమ్ అనజా పర్వతచ్యుతే |
ఘర్మస్తుభే దివ ఆ పృష్ఠయజ్వనే ద్యుమ్నశ్రవసే మహి నృమ్ణమ్ అర్చత || 5-054-01
ప్ర వో మరుతస్ తవిషా ఉదన్యవో వయోవృధో అశ్వయుజః పరిజ్రయః |
సం విద్యుతా దధతి వాశతి త్రితః స్వరన్త్య్ ఆపో ऽవనా పరిజ్రయః || 5-054-02
విద్యున్మహసో నరో అశ్మదిద్యవో వాతత్విషో మరుతః పర్వతచ్యుతః |
అబ్దయా చిన్ ముహుర్ ఆ హ్రాదునీవృత స్తనయదమా రభసా ఉదోజసః || 5-054-03
వ్య్ అక్తూన్ రుద్రా వ్య్ అహాని శిక్వసో వ్య్ అన్తరిక్షం వి రజాంసి ధూతయః |
వి యద్ అజ్రాఅజథ నావ ఈం యథా వి దుర్గాణి మరుతో నాహ రిష్యథ || 5-054-04
తద్ వీర్యం వో మరుతో మహిత్వనం దీర్ఘం తతాన సూర్యో న యోజనమ్ |
ఏతా న యామే అగృభీతశోచిషో ऽనశ్వదాం యన్ న్య్ అయాతనా గిరిమ్ || 5-054-05
అభ్రాజి శర్ధో మరుతో యద్ అర్ణసమ్ మోషథా వృక్షం కపనేవ వేధసః |
అధ స్మా నో అరమతిం సజోషసశ్ చక్షుర్ ఇవ యన్తమ్ అను నేషథా సుగమ్ || 5-054-06
న స జీయతే మరుతో న హన్యతే న స్రేధతి న వ్యథతే న రిష్యతి |
నాస్య రాయ ఉప దస్యన్తి నోతయ ఋషిం వా యం రాజానం వా సుషూదథ || 5-054-07
నియుత్వన్తో గ్రామజితో యథా నరో ऽర్యమణో న మరుతః కబన్ధినః |
పిన్వన్త్య్ ఉత్సం యద్ ఇనాసో అస్వరన్ వ్య్ ఉన్దన్తి పృథివీమ్ మధ్వో అన్ధసా || 5-054-08
ప్రవత్వతీయమ్ పృథివీ మరుద్భ్యః ప్రవత్వతీ ద్యౌర్ భవతి ప్రయద్భ్యః |
ప్రవత్వతీః పథ్యా అన్తరిక్ష్యాః ప్రవత్వన్తః పర్వతా జీరదానవః || 5-054-09
యన్ మరుతః సభరసః స్వర్ణరః సూర్య ఉదితే మదథా దివో నరః |
న వో ऽశ్వాః శ్రథయన్తాహ సిస్రతః సద్యో అస్యాధ్వనః పారమ్ అశ్నుథ || 5-054-10
అంసేషు వ ఋష్టయః పత్సు ఖాదయో వక్షస్సు రుక్మా మరుతో రథే శుభః |
అగ్నిభ్రాజసో విద్యుతో గభస్త్యోః శిప్రాః శీర్షసు వితతా హిరణ్యయీః || 5-054-11
తం నాకమ్ అర్యో అగృభీతశోచిషం రుశత్ పిప్పలమ్ మరుతో వి ధూనుథ |
సమ్ అచ్యన్త వృజనాతిత్విషన్త యత్ స్వరన్తి ఘోషం వితతమ్ ఋతాయవః || 5-054-12
యుష్మాదత్తస్య మరుతో విచేతసో రాయః స్యామ రథ్యో వయస్వతః |
న యో యుచ్ఛతి తిష్యో యథా దివో ऽస్మే రారన్త మరుతః సహస్రిణమ్ || 5-054-13
యూయం రయిమ్ మరుత స్పార్హవీరం యూయమ్ ఋషిమ్ అవథ సామవిప్రమ్ |
యూయమ్ అర్వన్తమ్ భరతాయ వాజం యూయం ధత్థ రాజానం శ్రుష్టిమన్తమ్ || 5-054-14
తద్ వో యామి ద్రవిణం సద్యౌతయో యేనా స్వర్ ణ తతనామ నౄఅభి |
ఇదం సు మే మరుతో హర్యతా వచో యస్య తరేమ తరసా శతం హిమాః || 5-054-15
