ఆ ధేనవః పయసా తూర్ణ్యర్థా అమర్ధన్తీర్ ఉప నో యన్తు మధ్వా |
మహో రాయే బృహతీః సప్త విప్రో మయోభువో జరితా జోహవీతి || 5-043-01
ఆ సుష్టుతీ నమసా వర్తయధ్యై ద్యావా వాజాయ పృథివీ అమృధ్రే |
పితా మాతా మధువచాః సుహస్తా భరే-భరే నో యశసావ్ అవిష్టామ్ || 5-043-02
అధ్వర్యవశ్ చకృవాంసో మధూని ప్ర వాయవే భరత చారు శుక్రమ్ |
హోతేవ నః ప్రథమః పాహ్య్ అస్య దేవ మధ్వో రరిమా తే మదాయ || 5-043-03
దశ క్షిపో యుఞ్జతే బాహూ అద్రిం సోమస్య యా శమితారా సుహస్తా |
మధ్వో రసం సుగభస్తిర్ గిరిష్ఠాం చనిశ్చదద్ దుదుహే శుక్రమ్ అంశుః || 5-043-04
అసావి తే జుజుషాణాయ సోమః క్రత్వే దక్షాయ బృహతే మదాయ |
హరీ రథే సుధురా యోగే అర్వాగ్ ఇన్ద్ర ప్రియా కృణుహి హూయమానః || 5-043-05
ఆ నో మహీమ్ అరమతిం సజోషా గ్నాం దేవీం నమసా రాతహవ్యామ్ |
మధోర్ మదాయ బృహతీమ్ ఋతజ్ఞామ్ ఆగ్నే వహ పథిభిర్ దేవయానైః || 5-043-06
అఞ్జన్తి యమ్ ప్రథయన్తో న విప్రా వపావన్తం నాగ్నినా తపన్తః |
పితుర్ న పుత్ర ఉపసి ప్రేష్ఠ ఆ ఘర్మో అగ్నిమ్ ఋతయన్న్ అసాది || 5-043-07
అచ్ఛా మహీ బృహతీ శంతమా గీర్ దూతో న గన్త్వ్ అశ్వినా హువధ్యై |
మయోభువా సరథా యాతమ్ అర్వాగ్ గన్తం నిధిం ధురమ్ ఆణిర్ న నాభిమ్ || 5-043-08
ప్ర తవ్యసో నమऽక్తిం తురస్యాహమ్ పూష్ణ ఉత వాయోర్ అదిక్షి |
యా రాధసా చోదితారా మతీనాం యా వాజస్య ద్రవిణోదా ఉత త్మన్ || 5-043-09
ఆ నామభిర్ మరుతో వక్షి విశ్వాన్ ఆ రూపేభిర్ జాతవేదో హువానః |
యజ్ఞం గిరో జరితుః సుష్టుతిం చ విశ్వే గన్త మరుతో విశ్వ ఊతీ || 5-043-10
ఆ నో దివో బృహతః పర్వతాద్ ఆ సరస్వతీ యజతా గన్తు యజ్ఞమ్ |
హవం దేవీ జుజుషాణా ఘృతాచీ శగ్మాం నో వాచమ్ ఉశతీ శృణోతు || 5-043-11
ఆ వేధసం నీలపృష్ఠమ్ బృహన్తమ్ బృహస్పతిం సదనే సాదయధ్వమ్ |
సాదద్యోనిం దమ ఆ దీదివాంసం హిరణ్యవర్ణమ్ అరుషం సపేమ || 5-043-12
ఆ ధర్ణసిర్ బృహద్దివో రరాణో విశ్వేభిర్ గన్త్వ్ ఓమభిర్ హువానః |
గ్నా వసాన ఓషధీర్ అమృధ్రస్ త్రిధాతుశృఙ్గో వృషభో వయోధాః || 5-043-13
మాతుష్ పదే పరమే శుక్ర ఆయోర్ విపన్యవో రాస్పిరాసో అగ్మన్ |
సుశేవ్యం నమసా రాతహవ్యాః శిశుమ్ మృజన్త్య్ ఆయవో న వాసే || 5-043-14
బృహద్ వయో బృహతే తుభ్యమ్ అగ్నే ధియాజురో మిథునాసః సచన్త |
దేవో-దేవః సుహవో భూతు మహ్యమ్ మా నో మాతా పృథివీ దుర్మతౌ ధాత్ || 5-043-15
ఉరౌ దేవా అనిబాధే స్యామ |
సమ్ అశ్వినోర్ అవసా నూతనేన మయోభువా సుప్రణీతీ గమేమ |
ఆ నో రయిం వహతమ్ ఓత వీరాన్ ఆ విశ్వాన్య్ అమృతా సౌభగాని || 5-043-17
