త్వామ్ అగ్నే వసుపతిం వసూనామ్ అభి ప్ర మన్దే అధ్వరేషు రాజన్ |
త్వయా వాజం వాజయన్తో జయేమాభి ష్యామ పృత్సుతీర్ మర్త్యానామ్ || 5-004-01
హవ్యవాళ్ అగ్నిర్ అజరః పితా నో విభుర్ విభావా సుదృశీకో అస్మే |
సుగార్హపత్యాః సమ్ ఇషో దిదీహ్య్ అస్మద్ర్యక్ సమ్ మిమీహి శ్రవాంసి || 5-004-02
విశాం కవిం విశ్పతిమ్ మానుషీణాం శుచిమ్ పావకం ఘృతపృష్ఠమ్ అగ్నిమ్ |
ని హోతారం విశ్వవిదం దధిధ్వే స దేవేషు వనతే వార్యాణి || 5-004-03
జుషస్వాగ్న ఇళయా సజోషా యతమానో రశ్మిభిః సూర్యస్య |
జుషస్వ నః సమిధం జాతవేద ఆ చ దేవాన్ హవిరద్యాయ వక్షి || 5-004-04
జుష్టో దమూనా అతిథిర్ దురోణ ఇమం నో యజ్ఞమ్ ఉప యాహి విద్వాన్ |
విశ్వా అగ్నే అభియుజో విహత్యా శత్రూయతామ్ ఆ భరా భోజనాని || 5-004-05
వధేన దస్యుమ్ ప్ర హి చాతయస్వ వయః కృణ్వానస్ తన్వే స్వాయై |
పిపర్షి యత్ సహసస్ పుత్ర దేవాన్త్ సో అగ్నే పాహి నృతమ వాజే అస్మాన్ || 5-004-06
వయం తే అగ్న ఉక్థైర్ విధేమ వయం హవ్యైః పావక భద్రశోచే |
అస్మే రయిం విశ్వవారం సమ్ ఇన్వాస్మే విశ్వాని ద్రవిణాని ధేహి || 5-004-07
అస్మాకమ్ అగ్నే అధ్వరం జుషస్వ సహసః సూనో త్రిషధస్థ హవ్యమ్ |
వయం దేవేషు సుకృతః స్యామ శర్మణా నస్ త్రివరూథేన పాహి || 5-004-08
విశ్వాని నో దుర్గహా జాతవేదః సిన్ధుం న నావా దురితాతి పర్షి |
అగ్నే అత్రివన్ నమసా గృణానో ऽస్మాకమ్ బోధ్య్ అవితా తనూనామ్ || 5-004-09
యస్ త్వా హృదా కీరిణా మన్యమానో ऽమర్త్యమ్ మర్త్యో జోహవీమి |
జాతవేదో యశో అస్మాసు ధేహి ప్రజాభిర్ అగ్నే అమృతత్వమ్ అశ్యామ్ || 5-004-10
యస్మై త్వం సుకృతే జాతవేద ఉలోకమ్ అగ్నే కృణవః స్యోనమ్ |
అశ్వినం స పుతృణం వీరవన్తం గోమన్తం రయిం నశతే స్వస్తి || 5-004-11
