యస్ తే సాధిష్ఠో ऽవస ఇన్ద్ర క్రతుష్ టమ్ ఆ భర |
అస్మభ్యం చర్షణీసహం సస్నిం వాజేషు దుష్టరమ్ || 5-035-01
యద్ ఇన్ద్ర తే చతస్రో యచ్ ఛూర సన్తి తిస్రః |
యద్ వా పఞ్చ క్షితీనామ్ అవస్ తత్ సు న ఆ భర || 5-035-02
ఆ తే ऽవో వరేణ్యం వృషన్తమస్య హూమహే |
వృషజూతిర్ హి జజ్ఞిష ఆభూభిర్ ఇన్ద్ర తుర్వణిః || 5-035-03
వృషా హ్య్ అసి రాధసే జజ్ఞిషే వృష్ణి తే శవః |
స్వక్షత్రం తే ధృషన్ మనః సత్రాహమ్ ఇన్ద్ర పౌంస్యమ్ || 5-035-04
త్వం తమ్ ఇన్ద్ర మర్త్యమ్ అమిత్రయన్తమ్ అద్రివః |
సర్వరథా శతక్రతో ని యాహి శవసస్ పతే || 5-035-05
త్వామ్ ఇద్ వృత్రహన్తమ జనాసో వృక్తబర్హిషః |
ఉగ్రమ్ పూర్వీషు పూర్వ్యం హవన్తే వాజసాతయే || 5-035-06
అస్మాకమ్ ఇన్ద్ర దుష్టరమ్ పురోయావానమ్ ఆజిషు |
సయావానం ధనే-ధనే వాజయన్తమ్ అవా రథమ్ || 5-035-07
అస్మాకమ్ ఇన్ద్రేహి నో రథమ్ అవా పురంధ్యా |
వయం శవిష్ఠ వార్యం దివి శ్రవో దధీమహి దివి స్తోమమ్ మనామహే || 5-035-08
