క్వ స్య వీరః కో అపశ్యద్ ఇన్ద్రం సుఖరథమ్ ఈయమానం హరిభ్యామ్ |
యో రాయా వజ్రీ సుతసోమమ్ ఇచ్ఛన్ తద్ ఓకో గన్తా పురుహూత ఊతీ || 5-030-01
అవాచచక్షమ్ పదమ్ అస్య సస్వర్ ఉగ్రం నిధాతుర్ అన్వ్ ఆయమ్ ఇచ్ఛన్ |
అపృచ్ఛమ్ అన్యాఉత తే మ ఆహుర్ ఇన్ద్రం నరో బుబుధానా అశేమ || 5-030-02
ప్ర ను వయం సుతే యా తే కృతానీన్ద్ర బ్రవామ యాని నో జుజోషః |
వేదద్ అవిద్వాఞ్ ఛృణవచ్ చ విద్వాన్ వహతే ऽయమ్ మఘవా సర్వసేనః || 5-030-03
స్థిరమ్ మనశ్ చకృషే జాత ఇన్ద్ర వేషీద్ ఏకో యుధయే భూయసశ్ చిత్ |
అశ్మానం చిచ్ ఛవసా దిద్యుతో వి విదో గవామ్ ఊర్వమ్ ఉస్రియాణామ్ || 5-030-04
పరో యత్ త్వమ్ పరమ ఆజనిష్ఠాః పరావతి శ్రుత్యం నామ బిభ్రత్ |
అతశ్ చిద్ ఇన్ద్రాద్ అభయన్త దేవా విశ్వా అపో అజయద్ దాసపత్నీః || 5-030-05
తుభ్యేద్ ఏతే మరుతః సుశేవా అర్చన్త్య్ అర్కం సున్వన్త్య్ అన్ధః |
అహిమ్ ఓహానమ్ అప ఆశయానమ్ ప్ర మాయాభిర్ మాయినం సక్షద్ ఇన్ద్రః || 5-030-06
వి షూ మృధో జనుషా దానమ్ ఇన్వన్న్ అహన్ గవా మఘవన్ సంచకానః |
అత్రా దాసస్య నముచేః శిరో యద్ అవర్తయో మనవే గాతుమ్ ఇచ్ఛన్ || 5-030-07
యుజం హి మామ్ అకృథా ఆద్ ఇద్ ఇన్ద్ర శిరో దాసస్య నముచేర్ మథాయన్ |
అశ్మానం చిత్ స్వర్యం వర్తమానమ్ ప్ర చక్రియేవ రోదసీ మరుద్భ్యః || 5-030-08
స్త్రియో హి దాస ఆయుధాని చక్రే కిమ్ మా కరన్న్ అబలా అస్య సేనాః |
అన్తర్ హ్య్ అఖ్యద్ ఉభే అస్య ధేనే అథోప ప్రైద్ యుధయే దస్యుమ్ ఇన్ద్రః || 5-030-09
సమ్ అత్ర గావో ऽభితో ऽనవన్తేహేహ వత్సైర్ వియుతా యద్ ఆసన్ |
సం తా ఇన్ద్రో అసృజద్ అస్య శాకైర్ యద్ ఈం సోమాసః సుషుతా అమన్దన్ || 5-030-10
యద్ ఈం సోమా బభ్రుధూతా అమన్దన్న్ అరోరవీద్ వృషభః సాదనేషు |
పురందరః పపివాఇన్ద్రో అస్య పునర్ గవామ్ అదదాద్ ఉస్రియాణామ్ || 5-030-11
భద్రమ్ ఇదం రుశమా అగ్నే అక్రన్ గవాం చత్వారి దదతః సహస్రా |
ఋణంచయస్య ప్రయతా మఘాని ప్రత్య్ అగ్రభీష్మ నృతమస్య నృణామ్ || 5-030-12
సుపేశసమ్ మావ సృజన్త్య్ అస్తం గవాం సహస్రై రుశమాసో అగ్నే |
తీవ్రా ఇన్ద్రమ్ అమమన్దుః సుతాసో ऽక్తోర్ వ్యుష్టౌ పరితక్మ్యాయాః || 5-030-13
ఔచ్ఛత్ సా రాత్రీ పరితక్మ్యా యాఋణంచయే రాజని రుశమానామ్ |
అత్యో న వాజీ రఘుర్ అజ్యమానో బభ్రుశ్ చత్వార్య్ అసనత్ సహస్రా || 5-030-14
చతుఃసహస్రం గవ్యస్య పశ్వః ప్రత్య్ అగ్రభీష్మ రుశమేష్వ్ అగ్నే |
ఘర్మశ్ చిత్ తప్తః ప్రవృజే య ఆసీద్ అయస్మయస్ తం వ్ ఆదామ విప్రాః || 5-030-15
