కుమారమ్ మాతా యువతిః సముబ్ధం గుహా బిభర్తి న దదాతి పిత్రే |
అనీకమ్ అస్య న మినజ్ జనాసః పురః పశ్యన్తి నిహితమ్ అరతౌ || 5-002-01
కమ్ ఏతం త్వం యువతే కుమారమ్ పేషీ బిభర్షి మహిషీ జజాన |
పూర్వీర్ హి గర్భః శరదో వవర్ధాపశ్యం జాతం యద్ అసూత మాతా || 5-002-02
హిరణ్యదన్తం శుచివర్ణమ్ ఆరాత్ క్షేత్రాద్ అపశ్యమ్ ఆయుధా మిమానమ్ |
దదానో అస్మా అమృతం విపృక్వత్ కిమ్ మామ్ అనిన్ద్రాః కృణవన్న్ అనుక్థాః || 5-002-03
క్షేత్రాద్ అపశ్యం సనుతశ్ చరన్తం సుమద్ యూథం న పురు శోభమానమ్ |
న తా అగృభ్రన్న్ అజనిష్ట హి షః పలిక్నీర్ ఇద్ యువతయో భవన్తి || 5-002-04
కే మే మర్యకం వి యవన్త గోభిర్ న యేషాం గోపా అరణశ్ చిద్ ఆస |
య ఈం జగృభుర్ అవ తే సృజన్త్వ్ ఆజాతి పశ్వ ఉప నశ్ చికిత్వాన్ || 5-002-05
వసాం రాజానం వసతిం జనానామ్ అరాతయో ని దధుర్ మర్త్యేషు |
బ్రహ్మాణ్య్ అత్రేర్ అవ తం సృజన్తు నిన్దితారో నిన్ద్యాసో భవన్తు || 5-002-06
శునశ్ చిచ్ ఛేపం నిదితం సహస్రాద్ యూపాద్ అముఞ్చో అశమిష్ట హి షః |
ఏవాస్మద్ అగ్నే వి ముముగ్ధి పాశాన్ హోతశ్ చికిత్వ ఇహ తూ నిషద్య || 5-002-07
హృణీయమానో అప హి మద్ ఐయేః ప్ర మే దేవానాం వ్రతపా ఉవాచ |
ఇన్ద్రో విద్వాఅను హి త్వా చచక్ష తేనాహమ్ అగ్నే అనుశిష్ట ఆగామ్ || 5-002-08
వి జ్యోతిషా బృహతా భాత్య్ అగ్నిర్ ఆవిర్ విశ్వాని కృణుతే మహిత్వా |
ప్రాదేవీర్ మాయాః సహతే దురేవాః శిశీతే శృఙ్గే రక్షసే వినిక్షే || 5-002-09
ఉత స్వానాసో దివి షన్త్వ్ అగ్నేస్ తిగ్మాయుధా రక్షసే హన్తవా ఉ |
మదే చిద్ అస్య ప్ర రుజన్తి భామా న వరన్తే పరిబాధో అదేవీః || 5-002-10
ఏతం తే స్తోమం తువిజాత విప్రో రథం న ధీరః స్వపా అతక్షమ్ |
యదీద్ అగ్నే ప్రతి త్వం దేవ హర్యాః స్వర్వతీర్ అప ఏనా జయేమ || 5-002-11
తువిగ్రీవో వృషభో వావృధానో ऽశత్ర్వ్ అర్యః సమ్ అజాతి వేదః |
ఇతీమమ్ అగ్నిమ్ అమృతా అవోచన్ బర్హిష్మతే మనవే శర్మ యంసద్ ధవిష్మతే మనవే శర్మ యంసత్ || 5-002-12
