అబోధ్య్ అగ్నిః సమిధా జనానామ్ ప్రతి ధేనుమ్ ఇవాయతీమ్ ఉషాసమ్ |
యహ్వా ఇవ ప్ర వయామ్ ఉజ్జిహానాః ప్ర భానవః సిస్రతే నాకమ్ అచ్ఛ || 5-001-01
అబోధి హోతా యజథాయ దేవాన్ ఊర్ధ్వో అగ్నిః సుమనాః ప్రాతర్ అస్థాత్ |
సమిద్ధస్య రుశద్ అదర్శి పాజో మహాన్ దేవస్ తమసో నిర్ అమోచి || 5-001-02
యద్ ఈం గణస్య రశనామ్ అజీగః శుచిర్ అఙ్క్తే శుచిభిర్ గోభిర్ అగ్నిః |
ఆద్ దక్షిణా యుజ్యతే వాజయన్త్య్ ఉత్తానామ్ ఊర్ధ్వో అధయజ్ జుహూభిః || 5-001-03
అగ్నిమ్ అచ్ఛా దేవయతామ్ మనాంసి చక్షూంషీవ సూర్యే సం చరన్తి |
యద్ ఈం సువాతే ఉషసా విరూపే శ్వేతో వాజీ జాయతే అగ్రే అహ్నామ్ || 5-001-04
జనిష్ట హి జేన్యో అగ్రే అహ్నాం హితో హితేష్వ్ అరుషో వనేషు |
దమే-దమే సప్త రత్నా దధానో ऽగ్నిర్ హోతా ని షసాదా యజీయాన్ || 5-001-05
అగ్నిర్ హోతా న్య్ అసీదద్ యజీయాన్ ఉపస్థే మాతుః సురభా ఉలోకే |
యువా కవిః పురునిష్ఠ ఋతావా ధర్తా కృష్టీనామ్ ఉత మధ్య ఇద్ధః || 5-001-06
ప్ర ణు త్యం విప్రమ్ అధ్వరేషు సాధుమ్ అగ్నిం హోతారమ్ ఈళతే నమోభిః |
ఆ యస్ తతాన రోదసీ ఋతేన నిత్యమ్ మృజన్తి వాజినం ఘృతేన || 5-001-07
మార్జాల్యో మృజ్యతే స్వే దమూనాః కవిప్రశస్తో అతిథిః శివో నః |
సహస్రశృఙ్గో వృషభస్ తదోజా విశ్వాఅగ్నే సహసా ప్రాస్య్ అన్యాన్ || 5-001-08
ప్ర సద్యో అగ్నే అత్య్ ఏష్య్ అన్యాన్ ఆవిర్ యస్మై చారుతమో బభూథ |
ఈళేన్యో వపుష్యో విభావా ప్రియో విశామ్ అతిథిర్ మానుషీణామ్ || 5-001-09
తుభ్యమ్ భరన్తి క్షితయో యవిష్ఠ బలిమ్ అగ్నే అన్తిత ఓత దూరాత్ |
ఆ భన్దిష్ఠస్య సుమతిం చికిద్ధి బృహత్ తే అగ్నే మహి శర్మ భద్రమ్ || 5-001-10
ఆద్య రథమ్ భానుమో భానుమన్తమ్ అగ్నే తిష్ఠ యజతేభిః సమన్తమ్ |
విద్వాన్ పథీనామ్ ఉర్వ్ అన్తరిక్షమ్ ఏహ దేవాన్ హవిరద్యాయ వక్షి || 5-001-11
అవోచామ కవయే మేధ్యాయ వచో వన్దారు వృషభాయ వృష్ణే |
గవిష్ఠిరో నమసా స్తోమమ్ అగ్నౌ దివీవ రుక్మమ్ ఉరువ్యఞ్చమ్ అశ్రేత్ || 5-001-12
