సముద్రాద్ ఊర్మిర్ మధుమాఉద్ ఆరద్ ఉపాంశునా సమ్ అమృతత్వమ్ ఆనట్ |
ఘృతస్య నామ గుహ్యం యద్ అస్తి జిహ్వా దేవానామ్ అమృతస్య నాభిః || 4-058-01
వయం నామ ప్ర బ్రవామా ఘృతస్యాస్మిన్ యజ్ఞే ధారయామా నమోభిః |
ఉప బ్రహ్మా శృణవచ్ ఛస్యమానం చతుఃశృఙ్గో ऽవమీద్ గౌర ఏతత్ || 4-058-02
చత్వారి శృఙ్గా త్రయో అస్య పాదా ద్వే శీర్షే సప్త హస్తాసో అస్య |
త్రిధా బద్ధో వృషభో రోరవీతి మహో దేవో మర్త్యాఆ వివేశ || 4-058-03
త్రిధా హితమ్ పణిభిర్ గుహ్యమానం గవి దేవాసో ఘృతమ్ అన్వ్ అవిన్దన్ |
ఇన్ద్ర ఏకం సూర్య ఏకం జజాన వేనాద్ ఏకం స్వధయా నిష్ టతక్షుః || 4-058-04
ఏతా అర్షన్తి హృద్యాత్ సముద్రాచ్ ఛతవ్రజా రిపుణా నావచక్షే |
ఘృతస్య ధారా అభి చాకశీమి హిరణ్యయో వేతసో మధ్య ఆసామ్ || 4-058-05
సమ్యక్ స్రవన్తి సరితో న ధేనా అన్తర్ హృదా మనసా పూయమానాః |
ఏతే అర్షన్త్య్ ఊర్మయో ఘృతస్య మృగా ఇవ క్షిపణోర్ ఈషమాణాః || 4-058-06
సిన్ధోర్ ఇవ ప్రాధ్వనే శూఘనాసో వాతప్రమియః పతయన్తి యహ్వాః |
ఘృతస్య ధారా అరుషో న వాజీ కాష్ఠా భిన్దన్న్ ఊర్మిభిః పిన్వమానః || 4-058-07
అభి ప్రవన్త సమనేవ యోషాః కల్యాణ్యః స్మయమానాసో అగ్నిమ్ |
ఘృతస్య ధారాః సమిధో నసన్త తా జుషాణో హర్యతి జాతవేదాః || 4-058-08
కన్యా ఇవ వహతుమ్ ఏతవా ఉ అఞ్జ్య్ అఞ్జానా అభి చాకశీమి |
యత్ర సోమః సూయతే యత్ర యజ్ఞో ఘృతస్య ధారా అభి తత్ పవన్తే || 4-058-09
అభ్య్ అర్షత సుష్టుతిం గవ్యమ్ ఆజిమ్ అస్మాసు భద్రా ద్రవిణాని ధత్త |
ఇమం యజ్ఞం నయత దేవతా నో ఘృతస్య ధారా మధుమత్ పవన్తే || 4-058-10
ధామన్ తే విశ్వమ్ భువనమ్ అధి శ్రితమ్ అన్తః సముద్రే హృద్య్ అన్తర్ ఆయుషి |
అపామ్ అనీకే సమిథే య ఆభృతస్ తమ్ అశ్యామ మధుమన్తం త ఊర్మిమ్ || 4-058-11
