కో వస్ త్రాతా వసవః కో వరూతా ద్యావాభూమీ అదితే త్రాసీథాం నః |
సహీయసో వరుణ మిత్ర మర్తాత్ కో వో ऽధ్వరే వరివో ధాతి దేవాః || 4-055-01
ప్ర యే ధామాని పూర్వ్యాణ్య్ అర్చాన్ వి యద్ ఉచ్ఛాన్ వియోతారో అమూరాః |
విధాతారో వి తే దధుర్ అజస్రా ఋతధీతయో రురుచన్త దస్మాః || 4-055-02
ప్ర పస్త్యామ్ అదితిం సిన్ధుమ్ అర్కైః స్వస్తిమ్ ఈళే సఖ్యాయ దేవీమ్ |
ఉభే యథా నో అహనీ నిపాత ఉషాసానక్తా కరతామ్ అదబ్ధే || 4-055-03
వ్య్ అర్యమా వరుణశ్ చేతి పన్థామ్ ఇషస్ పతిః సువితం గాతుమ్ అగ్నిః |
ఇన్ద్రావిష్ణూ నృవద్ ఉ షు స్తవానా శర్మ నో యన్తమ్ అమవద్ వరూథమ్ || 4-055-04
ఆ పర్వతస్య మరుతామ్ అవాంసి దేవస్య త్రాతుర్ అవ్రి భగస్య |
పాత్ పతిర్ జన్యాద్ అంహసో నో మిత్రో మిత్రియాద్ ఉత న ఉరుష్యేత్ || 4-055-05
నూ రోదసీ అహినా బుధ్న్యేన స్తువీత దేవీ అప్యేభిర్ ఇష్టైః |
సముద్రం న సంచరణే సనిష్యవో ఘర్మస్వరసో నద్యో అప వ్రన్ || 4-055-06
దేవైర్ నో దేవ్య్ అదితిర్ ని పాతు దేవస్ త్రాతా త్రాయతామ్ అప్రయుచ్ఛన్ |
నహి మిత్రస్య వరుణస్య ధాసిమ్ అర్హామసి ప్రమియం సాన్వ్ అగ్నేః || 4-055-07
అగ్నిర్ ఈశే వసవ్యస్యాగ్నిర్ మహః సౌభగస్య |
తాన్య్ అస్మభ్యం రాసతే || 4-055-08
ఉషో మఘోన్య్ ఆ వహ సూనృతే వార్యా పురు |
అస్మభ్యం వాజినీవతి || 4-055-09
తత్ సు నః సవితా భగో వరుణో మిత్రో అర్యమా |
ఇన్ద్రో నో రాధసా గమత్ || 4-055-10
