యస్ తస్తమ్భ సహసా వి జ్మో అన్తాన్ బృహస్పతిస్ త్రిషధస్థో రవేణ |
తమ్ ప్రత్నాస ఋషయో దీధ్యానాః పురో విప్రా దధిరే మన్ద్రజిహ్వమ్ || 4-050-01
ధునేతయః సుప్రకేతమ్ మదన్తో బృహస్పతే అభి యే నస్ తతస్రే |
పృషన్తం సృప్రమ్ అదబ్ధమ్ ఊర్వమ్ బృహస్పతే రక్షతాద్ అస్య యోనిమ్ || 4-050-02
బృహస్పతే యా పరమా పరావద్ అత ఆ త ఋతస్పృశో ని షేదుః |
తుభ్యం ఖాతా అవతా అద్రిదుగ్ధా మధ్వ శ్చోతన్త్య్ అభితో విరప్శమ్ || 4-050-03
బృహస్పతిః ప్రథమం జాయమానో మహో జ్యోతిషః పరమే వ్యోమన్ |
సప్తాస్యస్ తువిజాతో రవేణ వి సప్తరశ్మిర్ అధమత్ తమాంసి || 4-050-04
స సుష్టుభా స ఋక్వతా గణేన వలం రురోజ ఫలిగం రవేణ |
బృహస్పతిర్ ఉస్రియా హవ్యసూదః కనిక్రదద్ వావశతీర్ ఉద్ ఆజత్ || 4-050-05
ఏవా పిత్రే విశ్వదేవాయ వృష్ణే యజ్ఞైర్ విధేమ నమసా హవిర్భిః |
బృహస్పతే సుప్రజా వీరవన్తో వయం స్యామ పతయో రయీణామ్ || 4-050-06
స ఇద్ రాజా ప్రతిజన్యాని విశ్వా శుష్మేణ తస్థావ్ అభి వీర్యేణ |
బృహస్పతిం యః సుభృతమ్ బిభర్తి వల్గూయతి వన్దతే పూర్వభాజమ్ || 4-050-07
స ఇత్ క్షేతి సుధిత ఓకసి స్వే తస్మా ఇళా పిన్వతే విశ్వదానీమ్ |
తస్మై విశః స్వయమ్ ఏవా నమన్తే యస్మిన్ బ్రహ్మా రాజని పూర్వ ఏతి || 4-050-08
అప్రతీతో జయతి సం ధనాని ప్రతిజన్యాన్య్ ఉత యా సజన్యా |
అవస్యవే యో వరివః కృణోతి బ్రహ్మణే రాజా తమ్ అవన్తి దేవాః || 4-050-09
ఇన్ద్రశ్ చ సోమమ్ పిబతమ్ బృహస్పతే ऽస్మిన్ యజ్ఞే మన్దసానా వృషణ్వసూ |
ఆ వాం విశన్త్వ్ ఇన్దవః స్వాభువో ऽస్మే రయిం సర్వవీరం ని యచ్ఛతమ్ || 4-050-10
బృహస్పత ఇన్ద్ర వర్ధతం నః సచా సా వాం సుమతిర్ భూత్వ్ అస్మే |
అవిష్టం ధియో జిగృతమ్ పురంధీర్ జజస్తమ్ అర్యో వనుషామ్ అరాతీః || 4-050-11
