అగ్రమ్ పిబా మధూనాం సుతం వాయో దివిష్టిషు |
త్వం హి పూర్వపా అసి || 4-046-01
శతేనా నో అభిష్టిభిర్ నియుత్వాఇన్ద్రసారథిః |
వాయో సుతస్య తృమ్పతమ్ || 4-046-02
ఆ వాం సహస్రం హరయ ఇన్ద్రవాయూ అభి ప్రయః |
వహన్తు సోమపీతయే || 4-046-03
రథం హిరణ్యవన్ధురమ్ ఇన్ద్రవాయూ స్వధ్వరమ్ |
ఆ హి స్థాథో దివిస్పృశమ్ || 4-046-04
రథేన పృథుపాజసా దాశ్వాంసమ్ ఉప గచ్ఛతమ్ |
ఇన్ద్రవాయూ ఇహా గతమ్ || 4-046-05
ఇన్ద్రవాయూ అయం సుతస్ తం దేవేభిః సజోషసా |
పిబతం దాశుషో గృహే || 4-046-06
ఇహ ప్రయాణమ్ అస్తు వామ్ ఇన్ద్రవాయూ విమోచనమ్ |
ఇహ వాం సోమపీతయే || 4-046-07
