క ఉ శ్రవత్ కతమో యజ్ఞియానాం వన్దారు దేవః కతమో జుషాతే |
కస్యేమాం దేవీమ్ అమృతేషు ప్రేష్ఠాం హృది శ్రేషామ సుష్టుతిం సుహవ్యామ్ || 4-043-01
కో మృళాతి కతమ ఆగమిష్ఠో దేవానామ్ ఉ కతమః శమ్భవిష్ఠః |
రథం కమ్ ఆహుర్ ద్రవదశ్వమ్ ఆశుం యం సూర్యస్య దుహితావృణీత || 4-043-02
మక్షూ హి ష్మా గచ్ఛథ ఈవతో ద్యూన్ ఇన్ద్రో న శక్తిమ్ పరితక్మ్యాయామ్ |
దివ ఆజాతా దివ్యా సుపర్ణా కయా శచీనామ్ భవథః శచిష్ఠా || 4-043-03
కా వామ్ భూద్ ఉపమాతిః కయా న ఆశ్వినా గమథో హూయమానా |
కో వామ్ మహశ్ చిత్ త్యజసో అభీక ఉరుష్యతమ్ మాధ్వీ దస్రా న ఊతీ || 4-043-04
ఉరు వాం రథః పరి నక్షతి ద్యామ్ ఆ యత్ సముద్రాద్ అభి వర్తతే వామ్ |
మధ్వా మాధ్వీ మధు వామ్ ప్రుషాయన్ యత్ సీం వామ్ పృక్షో భురజన్త పక్వాః || 4-043-05
సిన్ధుర్ హ వాం రసయా సిఞ్చద్ అశ్వాన్ ఘృణా వయో ऽరుషాసః పరి గ్మన్ |
తద్ ఊ షు వామ్ అజిరం చేతి యానం యేన పతీ భవథః సూర్యాయాః || 4-043-06
ఇహేహ యద్ వాం సమనా పపృక్షే సేయమ్ అస్మే సుమతిర్ వాజరత్నా |
ఉరుష్యతం జరితారం యువం హ శ్రితః కామో నాసత్యా యువద్రిక్ || 4-043-07
