ఉతో హి వాం దాత్రా సన్తి పూర్వా యా పూరుభ్యస్ త్రసదస్యుర్ నితోశే |
క్షేత్రాసాం దదథుర్ ఉర్వరాసాం ఘనం దస్యుభ్యో అభిభూతిమ్ ఉగ్రమ్ || 4-038-01
ఉత వాజినమ్ పురునిష్షిధ్వానం దధిక్రామ్ ఉ దదథుర్ విశ్వకృష్టిమ్ |
ఋజిప్యం శ్యేనమ్ ప్రుషితప్సుమ్ ఆశుం చర్కృత్యమ్ అర్యో నృపతిం న శూరమ్ || 4-038-02
యం సీమ్ అను ప్రవతేవ ద్రవన్తం విశ్వః పూరుర్ మదతి హర్షమాణః |
పడ్భిర్ గృధ్యన్తమ్ మేధయుం న శూరం రథతురం వాతమ్ ఇవ ధ్రజన్తమ్ || 4-038-03
యః స్మారున్ధానో గధ్యా సమత్సు సనుతరశ్ చరతి గోషు గచ్ఛన్ |
ఆవిరృజీకో విదథా నిచిక్యత్ తిరో అరతిమ్ పర్య్ ఆప ఆయోః || 4-038-04
ఉత స్మైనం వస్త్రమథిం న తాయుమ్ అను క్రోశన్తి క్షితయో భరేషు |
నీచాయమానం జసురిం న శ్యేనం శ్రవశ్ చాచ్ఛా పశుమచ్ చ యూథమ్ || 4-038-05
ఉత స్మాసు ప్రథమః సరిష్యన్ ని వేవేతి శ్రేణిభీ రథానామ్ |
స్రజం కృణ్వానో జన్యో న శుభ్వా రేణుం రేరిహత్ కిరణం దదశ్వాన్ || 4-038-06
ఉత స్య వాజీ సహురిర్ ఋతావా శుశ్రూషమాణస్ తన్వా సమర్యే |
తురం యతీషు తురయన్న్ ఋజిప్యో ऽధి భ్రువోః కిరతే రేణుమ్ ఋఞ్జన్ || 4-038-07
ఉత స్మాస్య తన్యతోర్ ఇవ ద్యోర్ ఋఘాయతో అభియుజో భయన్తే |
యదా సహస్రమ్ అభి షీమ్ అయోధీద్ దుర్వర్తుః స్మా భవతి భీమ ఋఞ్జన్ || 4-038-08
ఉత స్మాస్య పనయన్తి జనా జూతిం కృష్టిప్రో అభిభూతిమ్ ఆశోః |
ఉతైనమ్ ఆహుః సమిథే వియన్తః పరా దధిక్రా అసరత్ సహస్రైః || 4-038-09
ఆ దధిక్రాః శవసా పఞ్చ కృష్టీః సూర్య ఇవ జ్యోతిషాపస్ తతాన |
సహస్రసాః శతసా వాజ్య్ అర్వా పృణక్తు మధ్వా సమ్ ఇమా వచాంసి || 4-038-10
