అహమ్ మనుర్ అభవం సూర్యశ్ చాహం కక్షీవాఋషిర్ అస్మి విప్రః |
అహం కుత్సమ్ ఆర్జునేయం న్య్ ఋఞ్జే ऽహం కవిర్ ఉశనా పశ్యతా మా || 4-026-01
అహమ్ భూమిమ్ అదదామ్ ఆర్యాయాహం వృష్టిం దాశుషే మర్త్యాయ |
అహమ్ అపో అనయం వావశానా మమ దేవాసో అను కేతమ్ ఆయన్ || 4-026-02
అహమ్ పురో మన్దసానో వ్య్ ఆరం నవ సాకం నవతీః శమ్బరస్య |
శతతమం వేశ్యం సర్వతాతా దివోదాసమ్ అతిథిగ్వం యద్ ఆవమ్ || 4-026-03
ప్ర సు ష విభ్యో మరుతో విర్ అస్తు ప్ర శ్యేనః శ్యేనేభ్య ఆశుపత్వా |
అచక్రయా యత్ స్వధయా సుపర్ణో హవ్యమ్ భరన్ మనవే దేవజుష్టమ్ || 4-026-04
భరద్ యది విర్ అతో వేవిజానః పథోరుణా మనోజవా అసర్జి |
తూయం యయౌ మధునా సోమ్యేనోత శ్రవో వివిదే శ్యేనో అత్ర || 4-026-05
ఋజీపీ శ్యేనో దదమానో అంశుమ్ పరావతః శకునో మన్ద్రమ్ మదమ్ |
సోమమ్ భరద్ దాదృహాణో దేవావాన్ దివో అముష్మాద్ ఉత్తరాద్ ఆదాయ || 4-026-06
ఆదాయ శ్యేనో అభరత్ సోమం సహస్రం సవాఅయుతం చ సాకమ్ |
అత్రా పురంధిర్ అజహాద్ అరాతీర్ మదే సోమస్య మూరా అమూరః || 4-026-07
