భద్రం తే అగ్నే సహసిన్న్ అనీకమ్ ఉపాక ఆ రోచతే సూర్యస్య |
రుశద్ దృశే దదృశే నక్తయా చిద్ అరూక్షితం దృశ ఆ రూపే అన్నమ్ || 4-011-01
వి షాహ్య్ అగ్నే గృణతే మనీషాం ఖం వేపసా తువిజాత స్తవానః |
విశ్వేభిర్ యద్ వావనః శుక్ర దేవైస్ తన్ నో రాస్వ సుమహో భూరి మన్మ || 4-011-02
త్వద్ అగ్నే కావ్యా త్వన్ మనీషాస్ త్వద్ ఉక్థా జాయన్తే రాధ్యాని |
త్వద్ ఏతి ద్రవిణం వీరపేశా ఇత్థాధియే దాశుషే మర్త్యాయ || 4-011-03
త్వద్ వాజీ వాజమ్భరో విహాయా అభిష్టికృజ్ జాయతే సత్యశుష్మః |
త్వద్ రయిర్ దేవజూతో మయోభుస్ త్వద్ ఆశుర్ జూజువాఅగ్నే అర్వా || 4-011-04
త్వామ్ అగ్నే ప్రథమం దేవయన్తో దేవమ్ మర్తా అమృత మన్ద్రజిహ్వమ్ |
ద్వేషోయుతమ్ ఆ వివాసన్తి ధీభిర్ దమూనసం గృహపతిమ్ అమూరమ్ || 4-011-05
ఆరే అస్మద్ అమతిమ్ ఆరే అంహ ఆరే విశ్వాం దుర్మతిం యన్ నిపాసి |
దోషా శివః సహసః సూనో అగ్నే యం దేవ ఆ చిత్ సచసే స్వస్తి || 4-011-06
