ఇమా ఉ వామ్ భృమయో మన్యమానా యువావతే న తుజ్యా అభూవన్ |
క్వ త్యద్ ఇన్ద్రావరుణా యశో వాం యేన స్మా సినమ్ భరథః సఖిభ్యః || 3-062-01
అయమ్ ఉ వామ్ పురుతమో రయీయఞ్ ఛశ్వత్తమమ్ అవసే జోహవీతి |
సజోషావ్ ఇన్ద్రావరుణా మరుద్భిర్ దివా పృథివ్యా శృణుతం హవమ్ మే || 3-062-02
అస్మే తద్ ఇన్ద్రావరుణా వసు ష్యాద్ అస్మే రయిర్ మరుతః సర్వవీరః |
అస్మాన్ వరూత్రీః శరణైర్ అవన్త్వ్ అస్మాన్ హోత్రా భారతీ దక్షిణాభిః || 3-062-03
బృహస్పతే జుషస్వ నో హవ్యాని విశ్వదేవ్య |
రాస్వ రత్నాని దాశుషే || 3-062-04
శుచిమ్ అర్కైర్ బృహస్పతిమ్ అధ్వరేషు నమస్యత |
అనామ్య్ ఓజ ఆ చకే || 3-062-05
వృషభం చర్షణీనాం విశ్వరూపమ్ అదాభ్యమ్ |
బృహస్పతిం వరేణ్యమ్ || 3-062-06
ఇయం తే పూషన్న్ ఆఘృణే సుష్టుతిర్ దేవ నవ్యసీ |
అస్మాభిస్ తుభ్యం శస్యతే || 3-062-07
తాం జుషస్వ గిరమ్ మమ వాజయన్తీమ్ అవా ధియమ్ |
వధూయుర్ ఇవ యోషణామ్ || 3-062-08
యో విశ్వాభి విపశ్యతి భువనా సం చ పశ్యతి |
స నః పూషావితా భువత్ || 3-062-09
తత్ సవితుర్ వరేణ్యమ్ భర్గో దేవస్య ధీమహి |
ధియో యో నః ప్రచోదయాత్ || 3-062-10
దేవస్య సవితుర్ వయం వాజయన్తః పురంధ్యా |
భగస్య రాతిమ్ ఈమహే || 3-062-11
దేవం నరః సవితారం విప్రా యజ్ఞైః సువృక్తిభిః |
నమస్యన్తి ధియేషితాః || 3-062-12
సోమో జిగాతి గాతువిద్ దేవానామ్ ఏతి నిష్కృతమ్ |
ఋతస్య యోనిమ్ ఆసదమ్ || 3-062-13
సోమో అస్మభ్యం ద్విపదే చతుష్పదే చ పశవే |
అనమీవా ఇషస్ కరత్ || 3-062-14
అస్మాకమ్ ఆయుర్ వర్ధయన్న్ అభిమాతీః సహమానః |
సోమః సధస్థమ్ ఆసదత్ || 3-062-15
ఆ నో మిత్రావరుణా ఘృతైర్ గవ్యూతిమ్ ఉక్షతమ్ |
మధ్వా రజాంసి సుక్రతూ || 3-062-16
ఉరుశంసా నమోవృధా మహ్నా దక్షస్య రాజథః |
ద్రాఘిష్ఠాభిః శుచివ్రతా || 3-062-17
గృణానా జమదగ్నినా యోనావ్ ఋతస్య సీదతమ్ |
పాతం సోమమ్ ఋతావృధా || 3-062-18
