ఆ యాహ్య్ అర్వాఙ్ ఉప వన్ధురేష్ఠాస్ తవేద్ అను ప్రదివః సోమపేయమ్ |
ప్రియా సఖాయా వి ముచోప బర్హిస్ త్వామ్ ఇమే హవ్యవాహో హవన్తే || 3-043-01
ఆ యాహి పూర్వీర్ అతి చర్షణీర్ ఆఅర్య ఆశిష ఉప నో హరిభ్యామ్ |
ఇమా హి త్వా మతయ స్తోమతష్టా ఇన్ద్ర హవన్తే సఖ్యం జుషాణాః || 3-043-02
ఆ నో యజ్ఞం నమోవృధం సజోషా ఇన్ద్ర దేవ హరిభిర్ యాహి తూయమ్ |
అహం హి త్వా మతిభిర్ జోహవీమి ఘృతప్రయాః సధమాదే మధూనామ్ || 3-043-03
ఆ చ త్వామ్ ఏతా వృషణా వహాతో హరీ సఖాయా సుధురా స్వఙ్గా |
ధానావద్ ఇన్ద్రః సవనం జుషాణః సఖా సఖ్యుః శృణవద్ వన్దనాని || 3-043-04
కువిన్ మా గోపాం కరసే జనస్య కువిద్ రాజానమ్ మఘవన్న్ ఋజీషిన్ |
కువిన్ మ ఋషిమ్ పపివాంసం సుతస్య కువిన్ మే వస్వో అమృతస్య శిక్షాః || 3-043-05
ఆ త్వా బృహన్తో హరయో యుజానా అర్వాగ్ ఇన్ద్ర సధమాదో వహన్తు |
ప్ర యే ద్వితా దివ ఋఞ్జన్త్య్ ఆతాః సుసమ్మృష్టాసో వృషభస్య మూరాః || 3-043-06
ఇన్ద్ర పిబ వృషధూతస్య వృష్ణ ఆ యం తే శ్యేన ఉశతే జభార |
యస్య మదే చ్యావయసి ప్ర కృష్టీర్ యస్య మదే అప గోత్రా వవర్థ || 3-043-07
శునం హువేమ మఘవానమ్ ఇన్ద్రమ్ అస్మిన్ భరే నృతమం వాజసాతౌ |
శృణ్వన్తమ్ ఉగ్రమ్ ఊతయే సమత్సు ఘ్నన్తం వృత్రాణి సంజితం ధనానామ్ || 3-043-08
