ఉపేమ్ అసృక్షి వాజయుర్ వచస్యాం చనో దధీత నాద్యో గిరో మే |
అపాం నపాద్ ఆశుహేమా కువిత్ స సుపేశసస్ కరతి జోషిషద్ ధి || 2-035-01
ఇమం స్వ్ అస్మై హృద ఆ సుతష్టమ్ మన్త్రం వోచేమ కువిద్ అస్య వేదత్ |
అపాం నపాద్ అసుర్యస్య మహ్నా విశ్వాన్య్ అర్యో భువనా జజాన || 2-035-02
సమ్ అన్యా యన్త్య్ ఉప యన్త్య్ అన్యాః సమానమ్ ఊర్వం నద్యః పృణన్తి |
తమ్ ఊ శుచిం శుచయో దీదివాంసమ్ అపాం నపాతమ్ పరి తస్థుర్ ఆపః || 2-035-03
తమ్ అస్మేరా యువతయో యువానమ్ మర్మృజ్యమానాః పరి యన్త్య్ ఆపః |
స శుక్రేభిః శిక్వభీ రేవద్ అస్మే దీదాయానిధ్మో ఘృతనిర్ణిగ్ అప్సు || 2-035-04
అస్మై తిస్రో అవ్యథ్యాయ నారీర్ దేవాయ దేవీర్ దిధిషన్త్య్ అన్నమ్ |
కృతా ఇవోప హి ప్రసర్స్రే అప్సు స పీయూషం ధయతి పూర్వసూనామ్ || 2-035-05
అశ్వస్యాత్ర జనిమాస్య చ స్వర్ ద్రుహో రిషః సమ్పృచః పాహి సూరీన్ |
ఆమాసు పూర్షు పరో అప్రమృష్యం నారాతయో వి నశన్ నానృతాని || 2-035-06
స్వ ఆ దమే సుదుఘా యస్య ధేనుః స్వధామ్ పీపాయ సుభ్వ్ అన్నమ్ అత్తి |
సో అపాం నపాద్ ఊర్జయన్న్ అప్స్వ్ అన్తర్ వసుదేయాయ విధతే వి భాతి || 2-035-07
యో అప్స్వ్ ఆ శుచినా దైవ్యేన ఋతావాజస్ర ఉర్వియా విభాతి |
వయా ఇద్ అన్యా భువనాన్య్ అస్య ప్ర జాయన్తే వీరుధశ్ చ ప్రజాభిః || 2-035-08
అపాం నపాద్ ఆ హ్య్ అస్థాద్ ఉపస్థం జిహ్మానామ్ ఊర్ధ్వో విద్యుతం వసానః |
తస్య జ్యేష్ఠమ్ మహిమానం వహన్తీర్ హిరణ్యవర్ణాః పరి యన్తి యహ్వీః || 2-035-09
హిరణ్యరూపః స హిరణ్యసందృగ్ అపాం నపాత్ సేద్ ఉ హిరణ్యవర్ణః |
హిరణ్యయాత్ పరి యోనేర్ నిషద్యా హిరణ్యదా దదత్య్ అన్నమ్ అస్మై || 2-035-10
తద్ అస్యానీకమ్ ఉత చారు నామాపీచ్యం వర్ధతే నప్తుర్ అపామ్ |
యమ్ ఇన్ధతే యువతయః సమ్ ఇత్థా హిరణ్యవర్ణం ఘృతమ్ అన్నమ్ అస్య || 2-035-11
అస్మై బహూనామ్ అవమాయ సఖ్యే యజ్ఞైర్ విధేమ నమసా హవిర్భిః |
సం సాను మార్జ్మి దిధిషామి బిల్మైర్ దధామ్య్ అన్నైః పరి వన్ద ఋగ్భిః || 2-035-12
స ఈం వృషాజనయత్ తాసు గర్భం స ఈం శిశుర్ ధయతి తం రిహన్తి |
సో అపాం నపాద్ అనభిమ్లాతవర్ణో ऽన్యస్యేవేహ తన్వా వివేష || 2-035-13
అస్మిన్ పదే పరమే తస్థివాంసమ్ అధ్వస్మభిర్ విశ్వహా దీదివాంసమ్ |
ఆపో నప్త్రే ఘృతమ్ అన్నం వహన్తీః స్వయమ్ అత్కైః పరి దీయన్తి యహ్వీః || 2-035-14
అయాంసమ్ అగ్నే సుక్షితిం జనాయాయాంసమ్ ఉ మఘవద్భ్యః సువృక్తిమ్ |
విశ్వం తద్ భద్రం యద్ అవన్తి దేవా బృహద్ వదేమ విదథే సువీరాః || 2-035-15
