ఆ తే పితర్ మరుతాం సుమ్నమ్ ఏతు మా నః సూర్యస్య సందృశో యుయోథాః |
అభి నో వీరో అర్వతి క్షమేత ప్ర జాయేమహి రుద్ర ప్రజాభిః || 2-033-01
త్వాదత్తేభీ రుద్ర శంతమేభిః శతం హిమా అశీయ భేషజేభిః |
వ్య్ అస్మద్ ద్వేషో వితరం వ్య్ అంహో వ్య్ అమీవాశ్ చాతయస్వా విషూచీః || 2-033-02
శ్రేష్ఠో జాతస్య రుద్ర శ్రియాసి తవస్తమస్ తవసాం వజ్రబాహో |
పర్షి ణః పారమ్ అంహసః స్వస్తి విశ్వా అభీతీ రపసో యుయోధి || 2-033-03
మా త్వా రుద్ర చుక్రుధామా నమోభిర్ మా దుష్టుతీ వృషభ మా సహూతీ |
ఉన్ నో వీరాఅర్పయ భేషజేభిర్ భిషక్తమం త్వా భిషజాం శృణోమి || 2-033-04
హవీమభిర్ హవతే యో హవిర్భిర్ అవ స్తోమేభీ రుద్రం దిషీయ |
ఋదూదరః సుహవో మా నో అస్యై బభ్రుః సుశిప్రో రీరధన్ మనాయై || 2-033-05
ఉన్ మా మమన్ద వృషభో మరుత్వాన్ త్వక్షీయసా వయసా నాధమానమ్ |
ఘృణీవ ఛాయామ్ అరపా అశీయా వివాసేయం రుద్రస్య సుమ్నమ్ || 2-033-06
క్వ స్య తే రుద్ర మృళయాకుర్ హస్తో యో అస్తి భేషజో జలాషః |
అపభర్తా రపసో దైవ్యస్యాభీ ను మా వృషభ చక్షమీథాః || 2-033-07
ప్ర బభ్రవే వృషభాయ శ్వితీచే మహో మహీం సుష్టుతిమ్ ఈరయామి |
నమస్యా కల్మలీకినం నమోభిర్ గృణీమసి త్వేషం రుద్రస్య నామ || 2-033-08
స్థిరేభిర్ అఙ్గైః పురురూప ఉగ్రో బభ్రుః శుక్రేభిః పిపిశే హిరణ్యైః |
ఈశానాద్ అస్య భువనస్య భూరేర్ న వా ఉ యోషద్ రుద్రాద్ అసుర్యమ్ || 2-033-09
అర్హన్ బిభర్షి సాయకాని ధన్వార్హన్ నిష్కం యజతం విశ్వరూపమ్ |
అర్హన్న్ ఇదం దయసే విశ్వమ్ అభ్వం న వా ఓజీయో రుద్ర త్వద్ అస్తి || 2-033-10
స్తుహి శ్రుతం గర్తసదం యువానమ్ మృగం న భీమమ్ ఉపహత్నుమ్ ఉగ్రమ్ |
మృళా జరిత్రే రుద్ర స్తవానో ऽన్యం తే అస్మన్ ని వపన్తు సేనాః || 2-033-11
కుమారశ్ చిత్ పితరం వన్దమానమ్ ప్రతి నానామ రుద్రోపయన్తమ్ |
భూరేర్ దాతారం సత్పతిం గృణీషే స్తుతస్ త్వమ్ భేషజా రాస్య్ అస్మే || 2-033-12
యా వో భేషజా మరుతః శుచీని యా శంతమా వృషణో యా మయోభు |
యాని మనుర్ అవృణీతా పితా నస్ తా శం చ యోశ్ చ రుద్రస్య వశ్మి || 2-033-13
పరి ణో హేతీ రుద్రస్య వృజ్యాః పరి త్వేషస్య దుర్మతిర్ మహీ గాత్ |
అవ స్థిరా మఘవద్భ్యస్ తనుష్వ మీఢ్వస్ తోకాయ తనయాయ మృళ || 2-033-14
ఏవా బభ్రో వృషభ చేకితాన యథా దేవ న హృణీషే న హంసి |
హవనశ్రున్ నో రుద్రేహ బోధి బృహద్ వదేమ విదథే సువీరాః || 2-033-15
