ఏతా ఉ త్యా ఉషసః కేతుమ్ అక్రత పూర్వే అర్ధే రజసో భానుమ్ అఞ్జతే |
నిష్కృణ్వానా ఆయుధానీవ ధృష్ణవః ప్రతి గావో ऽరుషీర్ యన్తి మాతరః || 1-092-01
ఉద్ అపప్తన్న్ అరుణా భానవో వృథా స్వాయుజో అరుషీర్ గా అయుక్షత |
అక్రన్న్ ఉషాసో వయునాని పూర్వథా రుశన్తమ్ భానుమ్ అరుషీర్ అశిశ్రయుః || 1-092-02
అర్చన్తి నారీర్ అపసో న విష్టిభిః సమానేన యోజనేనా పరావతః |
ఇషం వహన్తీః సుకృతే సుదానవే విశ్వేద్ అహ యజమానాయ సున్వతే || 1-092-03
అధి పేశాంసి వపతే నృతూర్ ఇవాపోర్ణుతే వక్ష ఉస్రేవ బర్జహమ్ |
జ్యోతిర్ విశ్వస్మై భువనాయ కృణ్వతీ గావో న వ్రజం వ్య్ ఉషా ఆవర్ తమః || 1-092-04
ప్రత్య్ అర్చీ రుశద్ అస్యా అదర్శి వి తిష్ఠతే బాధతే కృష్ణమ్ అభ్వమ్ |
స్వరుం న పేశో విదథేష్వ్ అఞ్జఞ్ చిత్రం దివో దుహితా భానుమ్ అశ్రేత్ || 1-092-05
అతారిష్మ తమసస్ పారమ్ అస్యోషా ఉచ్ఛన్తీ వయునా కృణోతి |
శ్రియే ఛన్దో న స్మయతే విభాతీ సుప్రతీకా సౌమనసాయాజీగః || 1-092-06
భాస్వతీ నేత్రీ సూనృతానాం దివ స్తవే దుహితా గోతమేభిః |
ప్రజావతో నృవతో అశ్వబుధ్యాన్ ఉషో గోగ్రాఉప మాసి వాజాన్ || 1-092-07
ఉషస్ తమ్ అశ్యాం యశసం సువీరం దాసప్రవర్గం రయిమ్ అశ్వబుధ్యమ్ |
సుదంససా శ్రవసా యా విభాసి వాజప్రసూతా సుభగే బృహన్తమ్ || 1-092-08
విశ్వాని దేవీ భువనాభిచక్ష్యా ప్రతీచీ చక్షుర్ ఉర్వియా వి భాతి |
విశ్వం జీవం చరసే బోధయన్తీ విశ్వస్య వాచమ్ అవిదన్ మనాయోః || 1-092-09
పునః-పునర్ జాయమానా పురాణీ సమానం వర్ణమ్ అభి శుమ్భమానా |
శ్వఘ్నీవ కృత్నుర్ విజ ఆమినానా మర్తస్య దేవీ జరయన్త్య్ ఆయుః || 1-092-10
వ్యూర్ణ్వతీ దివో అన్తాఅబోధ్య్ అప స్వసారం సనుతర్ యుయోతి |
ప్రమినతీ మనుష్యా యుగాని యోషా జారస్య చక్షసా వి భాతి || 1-092-11
పశూన్ న చిత్రా సుభగా ప్రథానా సిన్ధుర్ న క్షోద ఉర్వియా వ్య్ అశ్వైత్ |
అమినతీ దైవ్యాని వ్రతాని సూర్యస్య చేతి రశ్మిభిర్ దృశానా || 1-092-12
ఉషస్ తచ్ చిత్రమ్ ఆ భరాస్మభ్యం వాజినీవతి |
యేన తోకం చ తనయం చ ధామహే || 1-092-13
ఉషో అద్యేహ గోమత్య్ అశ్వావతి విభావరి |
రేవద్ అస్మే వ్య్ ఉచ్ఛ సూనృతావతి || 1-092-14
యుక్ష్వా హి వాజినీవత్య్ అశ్వాఅద్యారుణాఉషః |
అథా నో విశ్వా సౌభగాన్య్ ఆ వహ || 1-092-15
అశ్వినా వర్తిర్ అస్మద్ ఆ గోమద్ దస్రా హిరణ్యవత్ |
అర్వాగ్ రథం సమనసా ని యచ్ఛతమ్ || 1-092-16
యావ్ ఇత్థా శ్లోకమ్ ఆ దివో జ్యోతిర్ జనాయ చక్రథుః |
ఆ న ఊర్జం వహతమ్ అశ్వినా యువమ్ || 1-092-17
ఏహ దేవా మయోభువా దస్రా హిరణ్యవర్తనీ |
ఉషర్బుధో వహన్తు సోమపీతయే || 1-092-18
