త్వం సోమ ప్ర చికితో మనీషా త్వం రజిష్ఠమ్ అను నేషి పన్థామ్ |
తవ ప్రణీతీ పితరో న ఇన్దో దేవేషు రత్నమ్ అభజన్త ధీరాః || 1-091-01
త్వం సోమ క్రతుభిః సుక్రతుర్ భూస్ త్వం దక్షైః సుదక్షో విశ్వవేదాః |
త్వం వృషా వృషత్వేభిర్ మహిత్వా ద్యుమ్నేభిర్ ద్యుమ్న్య్ అభవో నృచక్షాః || 1-091-02
రాజ్ఞో ను తే వరుణస్య వ్రతాని బృహద్ గభీరం తవ సోమ ధామ |
శుచిష్ ట్వమ్ అసి ప్రియో న మిత్రో దక్షాయ్యో అర్యమేవాసి సోమ || 1-091-03
యా తే ధామాని దివి యా పృథివ్యాం యా పర్వతేష్వ్ ఓషధీష్వ్ అప్సు |
తేభిర్ నో విశ్వైః సుమనా అహేళన్ రాజన్ సోమ ప్రతి హవ్యా గృభాయ || 1-091-04
త్వం సోమాసి సత్పతిస్ త్వం రాజోత వృత్రహా |
త్వమ్ భద్రో అసి క్రతుః || 1-091-05
త్వం చ సోమ నో వశో జీవాతుం న మరామహే |
ప్రియస్తోత్రో వనస్పతిః || 1-091-06
త్వం సోమ మహే భగం త్వం యూన ఋతాయతే |
దక్షం దధాసి జీవసే || 1-091-07
త్వం నః సోమ విశ్వతో రక్షా రాజన్న్ అఘాయతః |
న రిష్యేత్ త్వావతః సఖా || 1-091-08
సోమ యాస్ తే మయోభువ ఊతయః సన్తి దాశుషే |
తాభిర్ నో ऽవితా భవ || 1-091-09
ఇమం యజ్ఞమ్ ఇదం వచో జుజుషాణ ఉపాగహి |
సోమ త్వం నో వృధే భవ || 1-091-10
సోమ గీర్భిష్ ట్వా వయం వర్ధయామో వచోవిదః |
సుమృళీకో న ఆ విశ || 1-091-11
గయస్ఫానో అమీవహా వసువిత్ పుష్టివర్ధనః |
సుమిత్రః సోమ నో భవ || 1-091-12
సోమ రారన్ధి నో హృది గావో న యవసేష్వ్ ఆ |
మర్య ఇవ స్వ ఓక్యే || 1-091-13
యః సోమ సఖ్యే తవ రారణద్ దేవ మర్త్యః |
తం దక్షః సచతే కవిః || 1-091-14
ఉరుష్యా ణో అభిశస్తేః సోమ ని పాహ్య్ అంహసః |
సఖా సుశేవ ఏధి నః || 1-091-15
ఆ ప్యాయస్వ సమ్ ఏతు తే విశ్వతః సోమ వృష్ణ్యమ్ |
భవా వాజస్య సంగథే || 1-091-16
ఆ ప్యాయస్వ మదిన్తమ సోమ విశ్వేభిర్ అంశుభిః |
భవా నః సుశ్రవస్తమః సఖా వృధే || 1-091-17
సం తే పయాంసి సమ్ ఉ యన్తు వాజాః సం వృష్ణ్యాన్య్ అభిమాతిషాహః |
ఆప్యాయమానో అమృతాయ సోమ దివి శ్రవాంస్య్ ఉత్తమాని ధిష్వ || 1-091-18
యా తే ధామాని హవిషా యజన్తి తా తే విశ్వా పరిభూర్ అస్తు యజ్ఞమ్ |
గయస్ఫానః ప్రతరణః సువీరో ऽవీరహా ప్ర చరా సోమ దుర్యాన్ || 1-091-19
సోమో ధేనుం సోమో అర్వన్తమ్ ఆశుం సోమో వీరం కర్మణ్యం దదాతి |
సాదన్యం విదథ్యం సభేయమ్ పితృశ్రవణం యో దదాశద్ అస్మై || 1-091-20
అషాళ్హం యుత్సు పృతనాసు పప్రిం స్వర్షామ్ అప్సాం వృజనస్య గోపామ్ |
భరేషుజాం సుక్షితిం సుశ్రవసం జయన్తం త్వామ్ అను మదేమ సోమ || 1-091-21
త్వమ్ ఇమా ఓషధీః సోమ విశ్వాస్ త్వమ్ అపో అజనయస్ త్వం గాః |
త్వమ్ ఆ తతన్థోర్వ్ అన్తరిక్షం త్వం జ్యోతిషా వి తమో వవర్థ || 1-091-22
దేవేన నో మనసా దేవ సోమ రాయో భాగం సహసావన్న్ అభి యుధ్య |
మా త్వా తనద్ ఈశిషే వీర్యస్యోభయేభ్యః ప్ర చికిత్సా గవిష్టౌ || 1-091-23
