ఇన్ద్రేహి మత్స్య్ అన్ధసో విశ్వేభిః సోమపర్వభిః |
మహాఅభిష్టిర్ ఓజసా || 1-009-01
ఏమ్ ఏనం సృజతా సుతే మన్దిమ్ ఇన్ద్రాయ మన్దినే |
చక్రిం విశ్వాని చక్రయే || 1-009-02
మత్స్వా సుశిప్ర మన్దిభి స్తోమేభిర్ విశ్వచర్షణే |
సచైషు సవనేష్వ్ ఆ || 1-009-03
అసృగ్రమ్ ఇన్ద్ర తే గిరః ప్రతి త్వామ్ ఉద్ అహాసత |
అజోషా వృషభమ్ పతిమ్ || 1-009-04
సం చోదయ చిత్రమ్ అర్వాగ్ రాధ ఇన్ద్ర వరేణ్యమ్ |
అసద్ ఇత్ తే విభు ప్రభు || 1-009-05
అస్మాన్ సు తత్ర చోదయేన్ద్ర రాయే రభస్వతః |
తువిద్యుమ్న యశస్వతః || 1-009-06
సం గోమద్ ఇన్ద్ర వాజవద్ అస్మే పృథు శ్రవో బృహత్ |
విశ్వాయుర్ ధేహ్య్ అక్షితమ్ || 1-009-07
అస్మే ధేహి శ్రవో బృహద్ ద్యుమ్నం సహస్రసాతమమ్ |
ఇన్ద్ర తా రథినీర్ ఇషః || 1-009-08
వసోర్ ఇన్ద్రం వసుపతిం గీర్భిర్ గృణన్త ఋగ్మియమ్ |
హోమ గన్తారమ్ ఊతయే || 1-009-09
సుతే-సుతే న్యోకసే బృహద్ బృహత ఏద్ అరిః |
ఇన్ద్రాయ శూషమ్ అర్చతి || 1-009-10
