ఏన్ద్ర సానసిం రయిం సజిత్వానం సదాసహమ్ |
వర్షిష్ఠమ్ ఊతయే భర || 1-008-01
ని యేన ముష్టిహత్యయా ని వృత్రా రుణధామహై |
త్వోతాసో న్య్ అర్వతా || 1-008-02
ఇన్ద్ర త్వోతాస ఆ వయం వజ్రం ఘనా దదీమహి |
జయేమ సం యుధి స్పృధః || 1-008-03
వయం శూరేభిర్ అస్తృభిర్ ఇన్ద్ర త్వయా యుజా వయమ్ |
సాసహ్యామ పృతన్యతః || 1-008-04
మహాఇన్ద్రః పరశ్ చ ను మహిత్వమ్ అస్తు వజ్రిణే |
ద్యౌర్ న ప్రథినా శవః || 1-008-05
సమోహే వా య ఆశత నరస్ తోకస్య సనితౌ |
విప్రాసో వా ధియాయవః || 1-008-06
యః కుక్షిః సోమపాతమః సముద్ర ఇవ పిన్వతే |
ఉర్వీర్ ఆపో న కాకుదః || 1-008-07
ఏవా హ్య్ అస్య సూనృతా విరప్శీ గోమతీ మహీ |
పక్వా శాఖా న దాశుషే || 1-008-08
ఏవా హి తే విభూతయ ఊతయ ఇన్ద్ర మావతే |
సద్యశ్ చిత్ సన్తి దాశుషే || 1-008-09
ఏవా హ్య్ అస్య కామ్యా స్తోమ ఉక్థం చ శంస్యా |
ఇన్ద్రాయ సోమపీతయే || 1-008-10
