అసావి సోమ ఇన్ద్ర తే శవిష్ఠ ధృష్ణవ్ ఆ గహి |
ఆ త్వా పృణక్త్వ్ ఇన్ద్రియం రజః సూర్యో న రశ్మిభిః || 1-084-01
ఇన్ద్రమ్ ఇద్ ధరీ వహతో ऽప్రతిధృష్టశవసమ్ |
ఋషీణాం చ స్తుతీర్ ఉప యజ్ఞం చ మానుషాణామ్ || 1-084-02
ఆ తిష్ఠ వృత్రహన్ రథం యుక్తా తే బ్రహ్మణా హరీ |
అర్వాచీనం సు తే మనో గ్రావా కృణోతు వగ్నునా || 1-084-03
ఇమమ్ ఇన్ద్ర సుతమ్ పిబ జ్యేష్ఠమ్ అమర్త్యమ్ మదమ్ |
శుక్రస్య త్వాభ్య్ అక్షరన్ ధారా ఋతస్య సాదనే || 1-084-04
ఇన్ద్రాయ నూనమ్ అర్చతోక్థాని చ బ్రవీతన |
సుతా అమత్సుర్ ఇన్దవో జ్యేష్ఠం నమస్యతా సహః || 1-084-05
నకిష్ ట్వద్ రథీతరో హరీ యద్ ఇన్ద్ర యచ్ఛసే |
నకిష్ ట్వాను మజ్మనా నకిః స్వశ్వ ఆనశే || 1-084-06
య ఏక ఇద్ విదయతే వసు మర్తాయ దాశుషే |
ఈశానో అప్రతిష్కుత ఇన్ద్రో అఙ్గ || 1-084-07
కదా మర్తమ్ అరాధసమ్ పదా క్షుమ్పమ్ ఇవ స్ఫురత్ |
కదా నః శుశ్రవద్ గిర ఇన్ద్రో అఙ్గ || 1-084-08
యశ్ చిద్ ధి త్వా బహుభ్య ఆ సుతావాఆవివాసతి |
ఉగ్రం తత్ పత్యతే శవ ఇన్ద్రో అఙ్గ || 1-084-09
స్వాదోర్ ఇత్థా విషూవతో మధ్వః పిబన్తి గౌర్యః |
యా ఇన్ద్రేణ సయావరీర్ వృష్ణా మదన్తి శోభసే వస్వీర్ అను స్వరాజ్యమ్ || 1-084-10
తా అస్య పృశనాయువః సోమం శ్రీణన్తి పృశ్నయః |
ప్రియా ఇన్ద్రస్య ధేనవో వజ్రం హిన్వన్తి సాయకం వస్వీర్ అను స్వరాజ్యమ్ || 1-084-11
తా అస్య నమసా సహః సపర్యన్తి ప్రచేతసః |
వ్రతాన్య్ అస్య సశ్చిరే పురూణి పూర్వచిత్తయే వస్వీర్ అను స్వరాజ్యమ్ || 1-084-12
ఇన్ద్రో దధీచో అస్థభిర్ వృత్రాణ్య్ అప్రతిష్కుతః |
జఘాన నవతీర్ నవ || 1-084-13
ఇచ్ఛన్న్ అశ్వస్య యచ్ ఛిరః పర్వతేష్వ్ అపశ్రితమ్ |
తద్ విదచ్ ఛర్యణావతి || 1-084-14
అత్రాహ గోర్ అమన్వత నామ త్వష్టుర్ అపీచ్యమ్ |
ఇత్థా చన్ద్రమసో గృహే || 1-084-15
కో అద్య యుఙ్క్తే ధురి గా ఋతస్య శిమీవతో భామినో దుర్హృణాయూన్ |
ఆసన్నిషూన్ హృత్స్వసో మయోభూన్ య ఏషామ్ భృత్యామ్ ఋణధత్ స జీవాత్ || 1-084-16
క ఈషతే తుజ్యతే కో బిభాయ కో మంసతే సన్తమ్ ఇన్ద్రం కో అన్తి |
కస్ తోకాయ క ఇభాయోత రాయే ऽధి బ్రవత్ తన్వే కో జనాయ || 1-084-17
కో అగ్నిమ్ ఈట్టే హవిషా ఘృతేన స్రుచా యజాతా ఋతుభిర్ ధ్రువేభిః |
కస్మై దేవా ఆ వహాన్ ఆశు హోమ కో మంసతే వీతిహోత్రః సుదేవః || 1-084-18
త్వమ్ అఙ్గ ప్ర శంసిషో దేవః శవిష్ఠ మర్త్యమ్ |
న త్వద్ అన్యో మఘవన్న్ అస్తి మర్డితేన్ద్ర బ్రవీమి తే వచః || 1-084-19
మా తే రాధాంసి మా త ఊతయో వసో ऽస్మాన్ కదా చనా దభన్ |
విశ్వా చ న ఉపమిమీహి మానుష వసూని చర్షణిభ్య ఆ || 1-084-20
