ఇత్థా హి సోమ ఇన్ మదే బ్రహ్మా చకార వర్ధనమ్ |
శవిష్ఠ వజ్రిన్న్ ఓజసా పృథివ్యా నిః శశా అహిమ్ అర్చన్న్ అను స్వరాజ్యమ్ || 1-080-01
స త్వామదద్ వృషా మదః సోమః శ్యేనాభృతః సుతః |
యేనా వృత్రం నిర్ అద్భ్యో జఘన్థ వజ్రిన్న్ ఓజసార్చన్న్ అను స్వరాజ్యమ్ || 1-080-02
ప్రేహ్య్ అభీహి ధృష్ణుహి న తే వజ్రో ని యంసతే |
ఇన్ద్ర నృమ్ణం హి తే శవో హనో వృత్రం జయా అపో ऽర్చన్న్ అను స్వరాజ్యమ్ || 1-080-03
నిర్ ఇన్ద్ర భూమ్యా అధి వృత్రం జఘన్థ నిర్ దివః |
సృజా మరుత్వతీర్ అవ జీవధన్యా ఇమా అపో ऽర్చన్న్ అను స్వరాజ్యమ్ || 1-080-04
ఇన్ద్రో వృత్రస్య దోధతః సానుం వజ్రేణ హీళితః |
అభిక్రమ్యావ జిఘ్నతే ऽపః సర్మాయ చోదయన్న్ అర్చన్న్ అను స్వరాజ్యమ్ || 1-080-05
అధి సానౌ ని జిఘ్నతే వజ్రేణ శతపర్వణా |
మన్దాన ఇన్ద్రో అన్ధసః సఖిభ్యో గాతుమ్ ఇచ్ఛత్య్ అర్చన్న్ అను స్వరాజ్యమ్ || 1-080-06
ఇన్ద్ర తుభ్యమ్ ఇద్ అద్రివో ऽనుత్తం వజ్రిన్ వీర్యమ్ |
యద్ ధ త్యమ్ మాయినమ్ మృగం తమ్ ఉ త్వమ్ మాయయావధీర్ అర్చన్న్ అను స్వరాజ్యమ్ || 1-080-07
వి తే వజ్రాసో అస్థిరన్ నవతిం నావ్యా అను |
మహత్ త ఇన్ద్ర వీర్యమ్ బాహ్వోస్ తే బలం హితమ్ అర్చన్న్ అను స్వరాజ్యమ్ || 1-080-08
సహస్రం సాకమ్ అర్చత పరి ష్టోభత వింశతిః |
శతైనమ్ అన్వ్ అనోనవుర్ ఇన్ద్రాయ బ్రహ్మోద్యతమ్ అర్చన్న్ అను స్వరాజ్యమ్ || 1-080-09
ఇన్ద్రో వృత్రస్య తవిషీం నిర్ అహన్ సహసా సహః |
మహత్ తద్ అస్య పౌంస్యం వృత్రం జఘన్వాఅసృజద్ అర్చన్న్ అను స్వరాజ్యమ్ || 1-080-10
ఇమే చిత్ తవ మన్యవే వేపేతే భియసా మహీ |
యద్ ఇన్ద్ర వజ్రిన్న్ ఓజసా వృత్రమ్ మరుత్వాఅవధీర్ అర్చన్న్ అను స్వరాజ్యమ్ || 1-080-11
న వేపసా న తన్యతేన్ద్రం వృత్రో వి బీభయత్ |
అభ్య్ ఏనం వజ్ర ఆయసః సహస్రభృష్టిర్ ఆయతార్చన్న్ అను స్వరాజ్యమ్ || 1-080-12
యద్ వృత్రం తవ చాశనిం వజ్రేణ సమయోధయః |
అహిమ్ ఇన్ద్ర జిఘాంసతో దివి తే బద్బధే శవో ऽర్చన్న్ అను స్వరాజ్యమ్ || 1-080-13
అభిష్టనే తే అద్రివో యత్ స్థా జగచ్ చ రేజతే |
త్వష్టా చిత్ తవ మన్యవ ఇన్ద్ర వేవిజ్యతే భియార్చన్న్ అను స్వరాజ్యమ్ || 1-080-14
నహి ను యాద్ అధీమసీన్ద్రం కో వీర్యా పరః |
తస్మిన్ నృమ్ణమ్ ఉత క్రతుం దేవా ఓజాంసి సం దధుర్ అర్చన్న్ అను స్వరాజ్యమ్ || 1-080-15
యామ్ అథర్వా మనుష్ పితా దధ్యఙ్ ధియమ్ అత్నత |
తస్మిన్ బ్రహ్మాణి పూర్వథేన్ద్ర ఉక్థా సమ్ అగ్మతార్చన్న్ అను స్వరాజ్యమ్ || 1-080-16
