రయిర్ న యః పితృవిత్తో వయోధాః సుప్రణీతిశ్ చికితుషో న శాసుః |
స్యోనశీర్ అతిథిర్ న ప్రీణానో హోతేవ సద్మ విధతో వి తారీత్ || 1-073-01
దేవో న యః సవితా సత్యమన్మా క్రత్వా నిపాతి వృజనాని విశ్వా |
పురుప్రశస్తో అమతిర్ న సత్య ఆత్మేవ శేవో దిధిషాయ్యో భూత్ || 1-073-02
దేవో న యః పృథివీం విశ్వధాయా ఉపక్షేతి హితమిత్రో న రాజా |
పురఃసదః శర్మసదో న వీరా అనవద్యా పతిజుష్టేవ నారీ || 1-073-03
తం త్వా నరో దమ ఆ నిత్యమ్ ఇద్ధమ్ అగ్నే సచన్త క్షితిషు ధ్రువాసు |
అధి ద్యుమ్నం ని దధుర్ భూర్య్ అస్మిన్ భవా విశ్వాయుర్ ధరుణో రయీణామ్ || 1-073-04
వి పృక్షో అగ్నే మఘవానో అశ్యుర్ వి సూరయో దదతో విశ్వమ్ ఆయుః |
సనేమ వాజం సమిథేష్వ్ అర్యో భాగం దేవేషు శ్రవసే దధానాః || 1-073-05
ఋతస్య హి ధేనవో వావశానాః స్మదూధ్నీః పీపయన్త ద్యుభక్తాః |
పరావతః సుమతిమ్ భిక్షమాణా వి సిన్ధవః సమయా సస్రుర్ అద్రిమ్ || 1-073-06
త్వే అగ్నే సుమతిమ్ భిక్షమాణా దివి శ్రవో దధిరే యజ్ఞియాసః |
నక్తా చ చక్రుర్ ఉషసా విరూపే కృష్ణం చ వర్ణమ్ అరుణం చ సం ధుః || 1-073-07
యాన్ రాయే మర్తాన్ సుషూదో అగ్నే తే స్యామ మఘవానో వయం చ |
ఛాయేవ విశ్వమ్ భువనం సిసక్ష్య్ ఆపప్రివాన్ రోదసీ అన్తరిక్షమ్ || 1-073-08
అర్వద్భిర్ అగ్నే అర్వతో నృభిర్ నౄన్ వీరైర్ వీరాన్ వనుయామా త్వోతాః |
ఈశానాసః పితృవిత్తస్య రాయో వి సూరయః శతహిమా నో అశ్యుః || 1-073-09
ఏతా తే అగ్న ఉచథాని వేధో జుష్టాని సన్తు మనసే హృదే చ |
శకేమ రాయః సుధురో యమం తే ऽధి శ్రవో దేవభక్తం దధానాః || 1-073-10
