యుఞ్జన్తి బ్రధ్నమ్ అరుషం చరన్తమ్ పరి తస్థుషః |
రోచన్తే రోచనా దివి || 1-006-01
యుఞ్జన్త్య్ అస్య కామ్యా హరీ విపక్షసా రథే |
శోణా ధృష్ణూ నృవాహసా || 1-006-02
కేతుం కృణ్వన్న్ అకేతవే పేశో మర్యా అపేశసే |
సమ్ ఉషద్భిర్ అజాయథాః || 1-006-03
ఆద్ అహ స్వధామ్ అను పునర్ గర్భత్వమ్ ఏరిరే |
దధానా నామ యజ్ఞియమ్ || 1-006-04
వీళు చిద్ ఆరుజత్నుభిర్ గుహా చిద్ ఇన్ద్ర వహ్నిభిః |
అవిన్ద ఉస్రియా అను || 1-006-05
దేవయన్తో యథా మతిమ్ అచ్ఛా విదద్వసుం గిరః |
మహామ్ అనూషత శ్రుతమ్ || 1-006-06
ఇన్ద్రేణ సం హి దృక్షసే సంజగ్మానో అబిభ్యుషా |
మన్దూ సమానవర్చసా || 1-006-07
అనవద్యైర్ అభిద్యుభిర్ మఖః సహస్వద్ అర్చతి |
గణైర్ ఇన్ద్రస్య కామ్యైః || 1-006-08
అతః పరిజ్మన్న్ ఆ గహి దివో వా రోచనాద్ అధి |
సమ్ అస్మిన్న్ ఋఞ్జతే గిరః || 1-006-09
ఇతో వా సాతిమ్ ఈమహే దివో వా పార్థివాద్ అధి |
ఇన్ద్రమ్ మహో వా రజసః || 1-006-10
