న్య్ ఊ షు వాచమ్ ప్ర మహే భరామహే గిర ఇన్ద్రాయ సదనే వివస్వతః |
నూ చిద్ ధి రత్నం ససతామ్ ఇవావిదన్ న దుష్టుతిర్ ద్రవిణోదేషు శస్యతే || 1-053-01
దురో అశ్వస్య దుర ఇన్ద్ర గోర్ అసి దురో యవస్య వసున ఇనస్ పతిః |
శిక్షానరః ప్రదివో అకామకర్శనః సఖా సఖిభ్యస్ తమ్ ఇదం గృణీమసి || 1-053-02
శచీవ ఇన్ద్ర పురుకృద్ ద్యుమత్తమ తవేద్ ఇదమ్ అభితశ్ చేకితే వసు |
అతః సంగృభ్యాభిభూత ఆ భర మా త్వాయతో జరితుః కామమ్ ఊనయీః || 1-053-03
ఏభిర్ ద్యుభిః సుమనా ఏభిర్ ఇన్దుభిర్ నిరున్ధానో అమతిం గోభిర్ అశ్వినా |
ఇన్ద్రేణ దస్యుం దరయన్త ఇన్దుభిర్ యుతద్వేషసః సమ్ ఇషా రభేమహి || 1-053-04
సమ్ ఇన్ద్ర రాయా సమ్ ఇషా రభేమహి సం వాజేభిః పురుశ్చన్ద్రైర్ అభిద్యుభిః |
సం దేవ్యా ప్రమత్యా వీరశుష్మయా గోగ్రయాశ్వావత్యా రభేమహి || 1-053-05
తే త్వా మదా అమదన్ తాని వృష్ణ్యా తే సోమాసో వృత్రహత్యేషు సత్పతే |
యత్ కారవే దశ వృత్రాణ్య్ అప్రతి బర్హిష్మతే ని సహస్రాణి బర్హయః || 1-053-06
యుధా యుధమ్ ఉప ఘేద్ ఏషి ధృష్ణుయా పురా పురం సమ్ ఇదం హంస్య్ ఓజసా |
నమ్యా యద్ ఇన్ద్ర సఖ్యా పరావతి నిబర్హయో నముచిం నామ మాయినమ్ || 1-053-07
త్వం కరఞ్జమ్ ఉత పర్ణయం వధీస్ తేజిష్ఠయాతిథిగ్వస్య వర్తనీ |
త్వం శతా వఙ్గృదస్యాభినత్ పురో ऽనానుదః పరిషూతా ఋజిశ్వనా || 1-053-08
త్వమ్ ఏతాఞ్ జనరాజ్ఞో ద్విర్ దశాబన్ధునా సుశ్రవసోపజగ్ముషః |
షష్టిం సహస్రా నవతిం నవ శ్రుతో ని చక్రేణ రథ్యా దుష్పదావృణక్ || 1-053-09
త్వమ్ ఆవిథ సుశ్రవసం తవోతిభిస్ తవ త్రామభిర్ ఇన్ద్ర తూర్వయాణమ్ |
త్వమ్ అస్మై కుత్సమ్ అతిథిగ్వమ్ ఆయుమ్ మహే రాజ్ఞే యూనే అరన్ధనాయః || 1-053-10
య ఉదృచీన్ద్ర దేవగోపాః సఖాయస్ తే శివతమా అసామ |
త్వాం స్తోషామ త్వయా సువీరా ద్రాఘీయ ఆయుః ప్రతరం దధానాః || 1-053-11
