అయం వామ్ మధుమత్తమః సుతః సోమ ఋతావృధా |
తమ్ అశ్వినా పిబతం తిరోహ్న్యం ధత్తం రత్నాని దాశుషే || 1-047-01
త్రివన్ధురేణ త్రివృతా సుపేశసా రథేనా యాతమ్ అశ్వినా |
కణ్వాసో వామ్ బ్రహ్మ కృణ్వన్త్య్ అధ్వరే తేషాం సు శృణుతం హవమ్ || 1-047-02
అశ్వినా మధుమత్తమమ్ పాతం సోమమ్ ఋతావృధా |
అథాద్య దస్రా వసు బిభ్రతా రథే దాశ్వాంసమ్ ఉప గచ్ఛతమ్ || 1-047-03
త్రిషధస్థే బర్హిషి విశ్వవేదసా మధ్వా యజ్ఞమ్ మిమిక్షతమ్ |
కణ్వాసో వాం సుతసోమా అభిద్యవో యువాం హవన్తే అశ్వినా || 1-047-04
యాభిః కణ్వమ్ అభిష్టిభిః ప్రావతం యువమ్ అశ్వినా |
తాభిః ష్వ్ అస్మాఅవతం శుభస్ పతీ పాతం సోమమ్ ఋతావృధా || 1-047-05
సుదాసే దస్రా వసు బిభ్రతా రథే పృక్షో వహతమ్ అశ్వినా |
రయిం సముద్రాద్ ఉత వా దివస్ పర్య్ అస్మే ధత్తమ్ పురుస్పృహమ్ || 1-047-06
యన్ నాసత్యా పరావతి యద్ వా స్థో అధి తుర్వశే |
అతో రథేన సువృతా న ఆ గతం సాకం సూర్యస్య రశ్మిభిః || 1-047-07
అర్వాఞ్చా వాం సప్తయో ऽధ్వరశ్రియో వహన్తు సవనేద్ ఉప |
ఇషమ్ పృఞ్చన్తా సుకృతే సుదానవ ఆ బర్హిః సీదతం నరా || 1-047-08
తేన నాసత్యా గతం రథేన సూర్యత్వచా |
యేన శశ్వద్ ఊహథుర్ దాశుషే వసు మధ్వః సోమస్య పీతయే || 1-047-09
ఉక్థేభిర్ అర్వాగ్ అవసే పురూవసూ అర్కైశ్ చ ని హ్వయామహే |
శశ్వత్ కణ్వానాం సదసి ప్రియే హి కం సోమమ్ పపథుర్ అశ్వినా || 1-047-10
