కద్ రుద్రాయ ప్రచేతసే మీళ్హుష్టమాయ తవ్యసే |
వోచేమ శంతమం హృదే || 1-043-01
యథా నో అదితిః కరత్ పశ్వే నృభ్యో యథా గవే |
యథా తోకాయ రుద్రియమ్ || 1-043-02
యథా నో మిత్రో వరుణో యథా రుద్రశ్ చికేతతి |
యథా విశ్వే సజోషసః || 1-043-03
గాథపతిమ్ మేధపతిం రుద్రం జలాషభేషజమ్ |
తచ్ ఛంయోః సుమ్నమ్ ఈమహే || 1-043-04
యః శుక్ర ఇవ సూర్యో హిరణ్యమ్ ఇవ రోచతే |
శ్రేష్ఠో దేవానాం వసుః || 1-043-05
శం నః కరత్య్ అర్వతే సుగమ్ మేషాయ మేష్యే |
నృభ్యో నారిభ్యో గవే || 1-043-06
అస్మే సోమ శ్రియమ్ అధి ని ధేహి శతస్య నృణామ్ |
మహి శ్రవస్ తువినృమ్ణమ్ || 1-043-07
మా నః సోమపరిబాధో మారాతయో జుహురన్త |
ఆ న ఇన్దో వాజే భజ || 1-043-08
యాస్ తే ప్రజా అమృతస్య పరస్మిన్ ధామన్న్ ఋతస్య |
మూర్ధా నాభా సోమ వేన ఆభూషన్తీః సోమ వేదః || 1-043-09
