ఉత్ తిష్ఠ బ్రహ్మణస్ పతే దేవయన్తస్ త్వేమహే |
ఉప ప్ర యన్తు మరుతః సుదానవ ఇన్ద్ర ప్రాశూర్ భవా సచా || 1-040-01
త్వామ్ ఇద్ ధి సహసస్ పుత్ర మర్త్య ఉపబ్రూతే ధనే హితే |
సువీర్యమ్ మరుత ఆ స్వశ్వ్యం దధీత యో వ ఆచకే || 1-040-02
ప్రైతు బ్రహ్మణస్ పతిః ప్ర దేవ్య్ ఏతు సూనృతా |
అచ్ఛా వీరం నర్యమ్ పఙ్క్తిరాధసం దేవా యజ్ఞం నయన్తు నః || 1-040-03
యో వాఘతే దదాతి సూనరం వసు స ధత్తే అక్షితి శ్రవః |
తస్మా ఇళాం సువీరామ్ ఆ యజామహే సుప్రతూర్తిమ్ అనేహసమ్ || 1-040-04
ప్ర నూనమ్ బ్రహ్మణస్ పతిర్ మన్త్రం వదత్య్ ఉక్థ్యమ్ |
యస్మిన్న్ ఇన్ద్రో వరుణో మిత్రో అర్యమా దేవా ఓకాంసి చక్రిరే || 1-040-05
తమ్ ఇద్ వోచేమా విదథేషు శమ్భువమ్ మన్త్రం దేవా అనేహసమ్ |
ఇమాం చ వాచమ్ ప్రతిహర్యథా నరో విశ్వేద్ వామా వో అశ్నవత్ || 1-040-06
కో దేవయన్తమ్ అశ్నవజ్ జనం కో వృక్తబర్హిషమ్ |
ప్ర-ప్ర దాశ్వాన్ పస్త్యాభిర్ అస్థితాన్తర్వావత్ క్షయం దధే || 1-040-07
ఉప క్షత్రమ్ పృఞ్చీత హన్తి రాజభిర్ భయే చిత్ సుక్షితిం దధే |
నాస్య వర్తా న తరుతా మహాధనే నార్భే అస్తి వజ్రిణః || 1-040-08
