ఏతాయామోప గవ్యన్త ఇన్ద్రమ్ అస్మాకం సు ప్రమతిం వావృధాతి |
అనామృణః కువిద్ ఆద్ అస్య రాయో గవాం కేతమ్ పరమ్ ఆవర్జతే నః || 1-033-01
ఉపేద్ అహం ధనదామ్ అప్రతీతం జుష్టాం న శ్యేనో వసతిమ్ పతామి |
ఇన్ద్రం నమస్యన్న్ ఉపమేభిర్ అర్కైర్ య స్తోతృభ్యో హవ్యో అస్తి యామన్ || 1-033-02
ని సర్వసేన ఇషుధీఅసక్త సమ్ అర్యో గా అజతి యస్య వష్టి |
చోష్కూయమాణ ఇన్ద్ర భూరి వామమ్ మా పణిర్ భూర్ అస్మద్ అధి ప్రవృద్ధ || 1-033-03
వధీర్ హి దస్యుం ధనినం ఘనేనఏకశ్ చరన్న్ ఉపశాకేభిర్ ఇన్ద్ర |
ధనోర్ అధి విషుణక్ తే వ్య్ ఆయన్న్ అయజ్వానః సనకాః ప్రేతిమ్ ఈయుః || 1-033-04
పరా చిచ్ ఛీర్షా వవృజుస్ త ఇన్ద్రాయజ్వానో యజ్వభి స్పర్ధమానాః |
ప్ర యద్ దివో హరివ స్థాతర్ ఉగ్ర నిర్ అవ్రతాఅధమో రోదస్యోః || 1-033-05
అయుయుత్సన్న్ అనవద్యస్య సేనామ్ అయాతయన్త క్షితయో నవగ్వాః |
వృషాయుధో న వధ్రయో నిరష్టాః ప్రవద్భిర్ ఇన్ద్రాచ్ చితయన్త ఆయన్ || 1-033-06
త్వమ్ ఏతాన్ రుదతో జక్షతశ్ చాయోధయో రజస ఇన్ద్ర పారే |
అవాదహో దివ ఆ దస్యుమ్ ఉచ్చా ప్ర సున్వత స్తువతః శంసమ్ ఆవః || 1-033-07
చక్రాణాసః పరీణహమ్ పృథివ్యా హిరణ్యేన మణినా శుమ్భమానాః |
న హిన్వానాసస్ తితిరుస్ త ఇన్ద్రమ్ పరి స్పశో అదధాత్ సూర్యేణ || 1-033-08
పరి యద్ ఇన్ద్ర రోదసీ ఉభే అబుభోజీర్ మహినా విశ్వతః సీమ్ |
అమన్యమానాఅభి మన్యమానైర్ నిర్ బ్రహ్మభిర్ అధమో దస్యుమ్ ఇన్ద్ర || 1-033-09
న యే దివః పృథివ్యా అన్తమ్ ఆపుర్ న మాయాభిర్ ధనదామ్ పర్యభూవన్ |
యుజం వజ్రం వృషభశ్ చక్ర ఇన్ద్రో నిర్ జ్యోతిషా తమసో గా అదుక్షత్ || 1-033-10
అను స్వధామ్ అక్షరన్న్ ఆపో అస్యావర్ధత మధ్య ఆ నావ్యానామ్ |
సధ్రీచీనేన మనసా తమ్ ఇన్ద్ర ఓజిష్ఠేన హన్మనాహన్న్ అభి ద్యూన్ || 1-033-11
న్య్ ఆవిధ్యద్ ఇలీబిశస్య దృళ్హా వి శృఙ్గిణమ్ అభినచ్ ఛుష్ణమ్ ఇన్ద్రః |
యావత్ తరో మఘవన్ యావద్ ఓజో వజ్రేణ శత్రుమ్ అవధీః పృతన్యుమ్ || 1-033-12
అభి సిధ్మో అజిగాద్ అస్య శత్రూన్ వి తిగ్మేన వృషభేణా పురో ऽభేత్ |
సం వజ్రేణాసృజద్ వృత్రమ్ ఇన్ద్రః ప్ర స్వామ్ మతిమ్ అతిరచ్ ఛాశదానః || 1-033-13
ఆవః కుత్సమ్ ఇన్ద్ర యస్మిఞ్ చాకన్ ప్రావో యుధ్యన్తం వృషభం దశద్యుమ్ |
శఫచ్యుతో రేణుర్ నక్షత ద్యామ్ ఉచ్ ఛ్వైత్రేయో నృషాహ్యాయ తస్థౌ || 1-033-14
ఆవః శమం వృషభం తుగ్ర్యాసు క్షేత్రజేషే మఘవఞ్ ఛ్విత్ర్యం గామ్ |
జ్యోక్ చిద్ అత్ర తస్థివాంసో అక్రఞ్ ఛత్రూయతామ్ అధరా వేదనాకః || 1-033-15
