ఇన్ద్రస్య ను వీర్యాణి ప్ర వోచం యాని చకార ప్రథమాని వజ్రీ |
అహన్న్ అహిమ్ అన్వ్ అపస్ తతర్ద ప్ర వక్షణా అభినత్ పర్వతానామ్ || 1-032-01
అహన్న్ అహిమ్ పర్వతే శిశ్రియాణం త్వష్టాస్మై వజ్రం స్వర్యం తతక్ష |
వాశ్రా ఇవ ధేనవః స్యన్దమానా అఞ్జః సముద్రమ్ అవ జగ్ముర్ ఆపః || 1-032-02
వృషాయమాణో ऽవృణీత సోమం త్రికద్రుకేష్వ్ అపిబత్ సుతస్య |
ఆ సాయకమ్ మఘవాదత్త వజ్రమ్ అహన్న్ ఏనమ్ ప్రథమజామ్ అహీనామ్ || 1-032-03
యద్ ఇన్ద్రాహన్ ప్రథమజామ్ అహీనామ్ ఆన్ మాయినామ్ అమినాః ప్రోత మాయాః |
ఆత్ సూర్యం జనయన్ ద్యామ్ ఉషాసం తాదీత్నా శత్రుం న కిలా వివిత్సే || 1-032-04
అహన్ వృత్రం వృత్రతరం వ్యంసమ్ ఇన్ద్రో వజ్రేణ మహతా వధేన |
స్కన్ధాంసీవ కులిశేనా వివృక్ణాహిః శయత ఉపపృక్ పృథివ్యాః || 1-032-05
అయోద్ధేవ దుర్మద ఆ హి జుహ్వే మహావీరం తువిబాధమ్ ఋజీషమ్ |
నాతారీద్ అస్య సమృతిం వధానాం సం రుజానాః పిపిష ఇన్ద్రశత్రుః || 1-032-06
అపాద్ అహస్తో అపృతన్యద్ ఇన్ద్రమ్ ఆస్య వజ్రమ్ అధి సానౌ జఘాన |
వృష్ణో వధ్రిః ప్రతిమానమ్ బుభూషన్ పురుత్రా వృత్రో అశయద్ వ్యస్తః || 1-032-07
నదం న భిన్నమ్ అముయా శయానమ్ మనో రుహాణా అతి యన్త్య్ ఆపః |
యాశ్ చిద్ వృత్రో మహినా పర్యతిష్ఠత్ తాసామ్ అహిః పత్సుతఃశీర్ బభూవ || 1-032-08
నీచావయా అభవద్ వృత్రపుత్రేన్ద్రో అస్యా అవ వధర్ జభార |
ఉత్తరా సూర్ అధరః పుత్ర ఆసీద్ దానుః శయే సహవత్సా న ధేనుః || 1-032-09
అతిష్ఠన్తీనామ్ అనివేశనానాం కాష్ఠానామ్ మధ్యే నిహితం శరీరమ్ |
వృత్రస్య నిణ్యం వి చరన్త్య్ ఆపో దీర్ఘం తమ ఆశయద్ ఇన్ద్రశత్రుః || 1-032-10
దాసపత్నీర్ అహిగోపా అతిష్ఠన్ నిరుద్ధా ఆపః పణినేవ గావః |
అపామ్ బిలమ్ అపిహితం యద్ ఆసీద్ వృత్రం జఘన్వాఅప తద్ వవార || 1-032-11
అశ్వ్యో వారో అభవస్ తద్ ఇన్ద్ర సృకే యత్ త్వా ప్రత్యహన్ దేవ ఏకః |
అజయో గా అజయః శూర సోమమ్ అవాసృజః సర్తవే సప్త సిన్ధూన్ || 1-032-12
నాస్మై విద్యున్ న తన్యతుః సిషేధ న యామ్ మిహమ్ అకిరద్ ధ్రాదునిం చ |
ఇన్ద్రశ్ చ యద్ యుయుధాతే అహిశ్ చోతాపరీభ్యో మఘవా వి జిగ్యే || 1-032-13
అహేర్ యాతారం కమ్ అపశ్య ఇన్ద్ర హృది యత్ తే జఘ్నుషో భీర్ అగచ్ఛత్ |
నవ చ యన్ నవతిం చ స్రవన్తీః శ్యేనో న భీతో అతరో రజాంసి || 1-032-14
ఇన్ద్రో యాతో ऽవసితస్య రాజా శమస్య చ శృఙ్గిణో వజ్రబాహుః |
సేద్ ఉ రాజా క్షయతి చర్షణీనామ్ అరాన్ న నేమిః పరి తా బభూవ || 1-032-15
