త్వమ్ అగ్నే ప్రథమో అఙ్గిరా ఋషిర్ దేవో దేవానామ్ అభవః శివః సఖా |
తవ వ్రతే కవయో విద్మనాపసో ऽజాయన్త మరుతో భ్రాజదృష్టయః || 1-031-01
త్వమ్ అగ్నే ప్రథమో అఙ్గిరస్తమః కవిర్ దేవానామ్ పరి భూషసి వ్రతమ్ |
విభుర్ విశ్వస్మై భువనాయ మేధిరో ద్విమాతా శయుః కతిధా చిద్ ఆయవే || 1-031-02
త్వమ్ అగ్నే ప్రథమో మాతరిశ్వన ఆవిర్ భవ సుక్రతూయా వివస్వతే |
అరేజేతాం రోదసీ హోతృవూర్యే ऽసఘ్నోర్ భారమ్ అయజో మహో వసో || 1-031-03
త్వమ్ అగ్నే మనవే ద్యామ్ అవాశయః పురూరవసే సుకృతే సుకృత్తరః |
శ్వాత్రేణ యత్ పిత్రోర్ ముచ్యసే పర్య్ ఆ త్వా పూర్వమ్ అనయన్న్ ఆపరమ్ పునః || 1-031-04
త్వమ్ అగ్నే వృషభః పుష్టివర్ధన ఉద్యతస్రుచే భవసి శ్రవాయ్యః |
య ఆహుతిమ్ పరి వేదా వషట్కృతిమ్ ఏకాయుర్ అగ్రే విశ ఆవివాససి || 1-031-05
త్వమ్ అగ్నే వృజినవర్తనిం నరం సక్మన్ పిపర్షి విదథే విచర్షణే |
యః శూరసాతా పరితక్మ్యే ధనే దభ్రేభిశ్ చిత్ సమృతా హంసి భూయసః || 1-031-06
త్వం తమ్ అగ్నే అమృతత్వ ఉత్తమే మర్తం దధాసి శ్రవసే దివే-దివే |
యస్ తాతృషాణ ఉభయాయ జన్మనే మయః కృణోషి ప్రయ ఆ చ సూరయే || 1-031-07
త్వం నో అగ్నే సనయే ధనానాం యశసం కారుం కృణుహి స్తవానః |
ఋధ్యామ కర్మాపసా నవేన దేవైర్ ద్యావాపృథివీ ప్రావతం నః || 1-031-08
త్వం నో అగ్నే పిత్రోర్ ఉపస్థ ఆ దేవో దేవేష్వ్ అనవద్య జాగృవిః |
తనూకృద్ బోధి ప్రమతిశ్ చ కారవే త్వం కల్యాణ వసు విశ్వమ్ ఓపిషే || 1-031-09
త్వమ్ అగ్నే ప్రమతిస్ త్వమ్ పితాసి నస్ త్వం వయస్కృత్ తవ జామయో వయమ్ |
సం త్వా రాయః శతినః సం సహస్రిణః సువీరం యన్తి వ్రతపామ్ అదాభ్య || 1-031-10
త్వామ్ అగ్నే ప్రథమమ్ ఆయుమ్ ఆయవే దేవా అకృణ్వన్ నహుషస్య విశ్పతిమ్ |
ఇళామ్ అకృణ్వన్ మనుషస్య శాసనీమ్ పితుర్ యత్ పుత్రో మమకస్య జాయతే || 1-031-11
త్వం నో అగ్నే తవ దేవ పాయుభిర్ మఘోనో రక్ష తన్వశ్ చ వన్ద్య |
త్రాతా తోకస్య తనయే గవామ్ అస్య్ అనిమేషం రక్షమాణస్ తవ వ్రతే || 1-031-12
త్వమ్ అగ్నే యజ్యవే పాయుర్ అన్తరో ऽనిషఙ్గాయ చతురక్ష ఇధ్యసే |
యో రాతహవ్యో ऽవృకాయ ధాయసే కీరేశ్ చిన్ మన్త్రమ్ మనసా వనోషి తమ్ || 1-031-13
త్వమ్ అగ్న ఉరుశంసాయ వాఘతే స్పార్హం యద్ రేక్ణః పరమం వనోషి తత్ |
ఆధ్రస్య చిత్ ప్రమతిర్ ఉచ్యసే పితా ప్ర పాకం శాస్సి ప్ర దిశో విదుష్టరః || 1-031-14
త్వమ్ అగ్నే ప్రయతదక్షిణం నరం వర్మేవ స్యూతమ్ పరి పాసి విశ్వతః |
స్వాదుక్షద్మా యో వసతౌ స్యోనకృజ్ జీవయాజం యజతే సోపమా దివః || 1-031-15
ఇమామ్ అగ్నే శరణిమ్ మీమృషో న ఇమమ్ అధ్వానం యమ్ అగామ దూరాత్ |
ఆపిః పితా ప్రమతిః సోమ్యానామ్ భృమిర్ అస్య్ ఋషికృన్ మర్త్యానామ్ || 1-031-16
మనుష్వద్ అగ్నే అఙ్గిరస్వద్ అఙ్గిరో యయాతివత్ సదనే పూర్వవచ్ ఛుచే |
అచ్ఛ యాహ్య్ ఆ వహా దైవ్యం జనమ్ ఆ సాదయ బర్హిషి యక్షి చ ప్రియమ్ || 1-031-17
ఏతేనాగ్నే బ్రహ్మణా వావృధస్వ శక్తీ వా యత్ తే చకృమా విదా వా |
ఉత ప్ర ణేష్య్ అభి వస్యో అస్మాన్ సం నః సృజ సుమత్యా వాజవత్యా || 1-031-18
