ఆ వ ఇన్ద్రం క్రివిం యథా వాజయన్తః శతక్రతుమ్ |
మంహిష్ఠం సిఞ్చ ఇన్దుభిః || 1-030-01
శతం వా యః శుచీనాం సహస్రం వా సమాశిరామ్ |
ఏద్ ఉ నిమ్నం న రీయతే || 1-030-02
సం యన్ మదాయ శుష్మిణ ఏనా హ్య్ అస్యోదరే |
సముద్రో న వ్యచో దధే || 1-030-03
అయమ్ ఉ తే సమ్ అతసి కపోత ఇవ గర్భధిమ్ |
వచస్ తచ్ చిన్ న ఓహసే || 1-030-04
స్తోత్రం రాధానామ్ పతే గిర్వాహో వీర యస్య తే |
విభూతిర్ అస్తు సూనృతా || 1-030-05
ఊర్ధ్వస్ తిష్ఠా న ఊతయే ऽస్మిన్ వాజే శతక్రతో |
సమ్ అన్యేషు బ్రవావహై || 1-030-06
యోగే-యోగే తవస్తరం వాజే-వాజే హవామహే |
సఖాయ ఇన్ద్రమ్ ఊతయే || 1-030-07
ఆ ఘా గమద్ యది శ్రవత్ సహస్రిణీభిర్ ఊతిభిః |
వాజేభిర్ ఉప నో హవమ్ || 1-030-08
అను ప్రత్నస్యౌకసో హువే తువిప్రతిం నరమ్ |
యం తే పూర్వమ్ పితా హువే || 1-030-09
తం త్వా వయం విశ్వవారా శాస్మహే పురుహూత |
సఖే వసో జరితృభ్యః || 1-030-10
అస్మాకం శిప్రిణీనాం సోమపాః సోమపావ్నామ్ |
సఖే వజ్రిన్ సఖీనామ్ || 1-030-11
తథా తద్ అస్తు సోమపాః సఖే వజ్రిన్ తథా కృణు |
యథా త ఉశ్మసీష్టయే || 1-030-12
రేవతీర్ నః సధమాద ఇన్ద్రే సన్తు తువివాజాః |
క్షుమన్తో యాభిర్ మదేమ || 1-030-13
ఆ ఘ త్వావాన్ త్మనాప్త స్తోతృభ్యో ధృష్ణవ్ ఇయానః |
ఋణోర్ అక్షం న చక్ర్యోః || 1-030-14
ఆ యద్ దువః శతక్రతవ్ ఆ కామం జరితౄణామ్ |
ఋణోర్ అక్షం న శచీభిః || 1-030-15
శశ్వద్ ఇన్ద్రః పోప్రుథద్భిర్ జిగాయ నానదద్భిః శాశ్వసద్భిర్ ధనాని |
స నో హిరణ్యరథం దంసనావాన్ స నః సనితా సనయే స నో ऽదాత్ || 1-030-16
ఆశ్వినావ్ అశ్వావత్యేషా యాతం శవీరయా |
గోమద్ దస్రా హిరణ్యవత్ || 1-030-17
సమానయోజనో హి వాం రథో దస్రావ్ అమర్త్యః |
సముద్రే అశ్వినేయతే || 1-030-18
న్య్ అఘ్న్యస్య మూర్ధని చక్రం రథస్య యేమథుః |
పరి ద్యామ్ అన్యద్ ఈయతే || 1-030-19
కస్ త ఉషః కధప్రియే భుజే మర్తో అమర్త్యే |
కం నక్షసే విభావరి || 1-030-20
వయం హి తే అమన్మహ్య్ ఆన్తాద్ ఆ పరాకాత్ |
అశ్వే న చిత్రే అరుషి || 1-030-21
త్వం త్యేభిర్ ఆ గహి వాజేభిర్ దుహితర్ దివః |
అస్మే రయిం ని ధారయ || 1-030-22
