అశ్వినా యజ్వరీర్ ఇషో ద్రవత్పాణీ శుభస్ పతీ |
పురుభుజా చనస్యతమ్ || 1-003-01
అశ్వినా పురుదంససా నరా శవీరయా ధియా |
ధిష్ణ్యా వనతం గిరః || 1-003-02
దస్రా యువాకవః సుతా నాసత్యా వృక్తబర్హిషః |
ఆ యాతం రుద్రవర్తనీ || 1-003-03
ఇన్ద్రా యాహి చిత్రభానో సుతా ఇమే త్వాయవః |
అణ్వీభిస్ తనా పూతాసః || 1-003-04
ఇన్ద్రా యాహి ధియేషితో విప్రజూతః సుతావతః |
ఉప బ్రహ్మాణి వాఘతః || 1-003-05
ఇన్ద్రా యాహి తూతుజాన ఉప బ్రహ్మాణి హరివః |
సుతే దధిష్వ నశ్ చనః || 1-003-06
ఓమాసశ్ చర్షణీధృతో విశ్వే దేవాస ఆ గత |
దాశ్వాంసో దాశుషః సుతమ్ || 1-003-07
విశ్వే దేవాసో అప్తురః సుతమ్ ఆ గన్త తూర్ణయః |
ఉస్రా ఇవ స్వసరాణి || 1-003-08
విశ్వే దేవాసో అస్రిధ ఏహిమాయాసో అద్రుహః |
మేధం జుషన్త వహ్నయః || 1-003-09
పావకా నః సరస్వతీ వాజేభిర్ వాజినీవతీ |
యజ్ఞం వష్టు ధియావసుః || 1-003-10
చోదయిత్రీ సూనృతానాం చేతన్తీ సుమతీనామ్ |
యజ్ఞం దధే సరస్వతీ || 1-003-11
మహో అర్ణః సరస్వతీ ప్ర చేతయతి కేతునా |
ధియో విశ్వా వి రాజతి || 1-003-12
