వాయవ్ ఆ యాహి దర్శతేమే సోమా అరంకృతాః |
తేషామ్ పాహి శ్రుధీ హవమ్ || 1-002-01
వాయ ఉక్థేభిర్ జరన్తే త్వామ్ అచ్ఛా జరితారః |
సుతసోమా అహర్విదః || 1-002-02
వాయో తవ ప్రపృఞ్చతీ ధేనా జిగాతి దాశుషే |
ఉరూచీ సోమపీతయే || 1-002-03
ఇన్ద్రవాయూ ఇమే సుతా ఉప ప్రయోభిర్ ఆ గతమ్ |
ఇన్దవో వామ్ ఉశన్తి హి || 1-002-04
వాయవ్ ఇన్ద్రశ్ చ చేతథః సుతానాం వాజినీవసూ |
తావ్ ఆ యాతమ్ ఉప ద్రవత్ || 1-002-05
వాయవ్ ఇన్ద్రశ్ చ సున్వత ఆ యాతమ్ ఉప నిష్కృతమ్ |
మక్ష్వ్ ఐత్థా ధియా నరా || 1-002-06
మిత్రం హువే పూతదక్షం వరుణం చ రిశాదసమ్ |
ధియం ఘృతాచీం సాధన్తా || 1-002-07
ఋతేన మిత్రావరుణావ్ ఋతావృధావ్ ఋతస్పృశా |
క్రతుమ్ బృహన్తమ్ ఆశాథే || 1-002-08
కవీ నో మిత్రావరుణా తువిజాతా ఉరుక్షయా |
దక్షం దధాతే అపసమ్ || 1-002-09
